А отъ перваго лѣта Михаилова царства до Олга князя Рускаго, иже пръвое нача княжити въ Киевѣ, лѣтъ 22. А отъ Олъга до Игоря лѣтъ 31. А отъ Игоря до Святослава, сына его, лѣть 33. А отъ Святослава, сына его, до Ярополка, сына его, лѣтъ 28. А Ярополкь княжилъ 8 лѣтъ. А Володимерь княжиль 37 лѣть. А Ярославь княжиль сынь его 40 лѣть. Купно же отъ пръваго князя Олъга, иже сѣде прьвое въ Киевѣ, до крещениа Рускои земли 4 князи; а киняжениа ихъ 102 лѣть. А Рюрикь княжи въ Новѣгородѣ 17 лѣтъ до Олгова княжениа. А всего княжениа до крещениа 127 лѣтъ. А по крещении Володимерь княжи 27 лѣть, а до крещениа 8 лѣтъ. По немъ Святополкь княжи 3 лѣта. Ярославь княжи 40 лѣтъ. Изяславь княжи 23 лѣта. Всеволодъ Ярославичь княжи 15 лѣтъ. А Михаило, нареченныи Святополкь, княжи 20 лѣтъ. Володимеръ Всеволодичь Манамахъ княжи 12 лѣть. Вячеславъ княжи 4 мѣсяци. Всеволодъ Ольговичь княжи 8 лѣть. Изяславь Мьстиславичь княжи лѣто едино. Братъ его Ростиславъ княжи 6 мѣсяць. Юрии княжи Долгорукии 3 лѣта. Андрѣи Боголюбывыи княжи 17 лѣть. Ярополкь княжи Ростиславичь лѣто едино. Михалко княжи лѣто. Всеволодъ Юриевичь княжи 37 лѣть. Юрии Всеволодичь княжи 5 лѣть. Костантинь Всеволодичь Ростовскыи княжи 2 лѣта. Паки по смерти его Юрии княжи 17 лѣть. Всего оба княжили 25 лѣтъ. Ярославъ, братъ ихь, Новогородскии, по Батыевѣ рати, 2 лѣта. Святославь Всеволодичь, братъ ихь, княжи 2 лѣта. Андрѣи, братъ ихъ, княжи 3 лѣта. Александрь Ярославичь Невьскии княжи 8 лѣть. Василеи Ярославичь, братъ ихь меншии, княжи 5 лѣть. Димитрии Александровичь Невского княжи 5 лѣтъ. Вкупѣ съ братомь Андрѣемъ перемогалися 8 лѣть. Андрѣи по братѣ княжи 11 лѣть. Сии Александровичи княжили 28 лѣтъ. Михаило Ярославичь Тверскии княжи 12 лѣть. Юрии Даниловичь княжи 4 лѣта. Дмитрии княжи 3 лѣта. Александрь княжи Михаиловичь 2 лѣта. И паки сице отъ Андрѣевы смерти 11 лѣтъ. А отъ Кавадыевы смерти до Федурьчюковы смерты лѣтъ 10. И по Федорчюковѣ смерти Иванъ Даниловичь княжи 2 лѣта. Семень Ивановичь княжи 14 лѣть. Ивань Ивановичь княжи 7 лѣть. Дмитрии Суздалскии княжи Костантиновичь лѣтъ 3. Димитрии Ивановичь Донескои княжи 27 лѣтъ. И Василеи княжи сынь его 12 лѣтъ. Василеи Василиевичь княжи 37 лѣть. Ивань Василиевичь княжи 39 лѣтъ. Василии Ивановичь княжи 31 лѣто. Сице славятся Русьстии князи: Пръвыи князь на Рускои землѣ Рурикь, пришедъ изъ Нѣмецъ. И Рурикъ же роди Игоря. Игорь роди Святослава. Святославь роди Владимера Великаго, иже крестися самъ и всю землю Рускую крести. Владимирь роди Ярослава. Ярославь роди Всеволода. Всеволодъ роди Володимера Манамаха. Володимерь роди Юриа Долгорукого. Юрии роди Всеволода Великого Гнѣзда. Всеволодь роди Юрья да Ярослава. Ярославь роди Александра Храбраго. Александръ роди Данила, пръваго Московского. Даниль роди Ивана Калиту, иже исправи Рускую землю отъ татеи и отъ разбоиникь. Ивань Калита роди Семиона. Семеонь роди Ивана. Ивань роди Димитриа, иже былся за Дономъ съ Мамаемъ. Димитрии роди Василия. Василеи роди Василиа, иже ослѣплень былъ. Василии роди Ивана. Ивань роди Ивана. Тотъ Ивань роди Димитриа, внука Иванова, а княжиль Василеи Ивановичь, и роди Василиа, Ивана и Юриа. ИНО РОДОСЛОВИЕ ТѢХЪ ЖЕ КНЯЗЕИ. Сынь Руриковь Игорь. Игоревь сынь Святославь. Сынове Святославли: Ярополкь, Олегь, Владимеръ Великыи. Сынове Володимерови: Вышеславъ, Станиславъ, Ярославъ, Судиславь, Святославъ, Изяславъ, Мъстиславь, Всеволодъ, Святополкь, Борись, Глѣбъ. Сынове Ярославли: Володимеръ, Изяслигавъ, Святославъ, Вячеславь, Всеволодъ. Сынове Всеволожи: Володимеръ Манамахъ, Ростиславъ. Сынове Володимеровы Манамаховъ: Ярославь, Ярополкь, Вячеславь, Всеволодъ, Юрыи, Андреи. Сынове Юриевы Долгорукого: Ярославъ, Ростиславъ, Андрѣи Боголюбскыи, Михаило, Всеволодъ, Борисъ, Глѣбъ, Мстиславъ, Василко. Сынове Всеволожи Великого Гнѣзда: Костянтинь Ростовскии, Юрии, Ярославъ Юриевскии, Володимеръ, Гаврило, Василеи. Сынове Ярославли: Александрь Невскии, Ярославъ Тверъскии, Андрѣи, Константинъ, Афанасии, Данило, Михаило, Василеи. Сынове Александрови Невскаго: Димитрии Переяславьскыи, Андреи Городецъкыи, Василеи Костромскии, Данило Пъсковскои, иже и пръвыи Московьскыи. Сынове Даниловы: Юрии великыи, Ивань, Борисъ, Семенъ, Александрь, Афанасии. Сынове Ивановы Калитины: Семень, Данило, Андреи, Семень, иже родися въ Кавадыеву рать, и по двою лѣту Данило, и по десяти лѣтъ Иоань, и по 12 Андреи. Сынове Семеновы: Василеи, Констянтинь отъ Настасии, а отъ Марии: Данило, Михаило, Иоань, Семень. Сынове Ивановы: Дмитрии, Иоанъ. А Володимеръ Андрѣевичь внукь Калитинь. Сынове Дмитриевы: Василеи, Юрии, Ивань, Семень, Андрѣи, Петръ, Константинъ. Сьнове Василиевы: Юрии, Иванъ, Данило, Семень, Василеи. Сынове Василиевы Василиевича: Ивань, Юрии, Андреи, Борисъ, Аньдреи. Сынове Ивановы Василиевича: Иванъ, Василеи, Юрии, Дьмитрии, Семень, Андреи. Сынь Ивановь Дмитреи. Сынове Василиевы: Ивань, Юрии.

О КНЯЖЕНИИ КИЕВСКОМЪ И О КНЯЗЕХЪ ИХЪ. Прьвыи Игорь, его же убиша Древляне; по немъ сынь его Святославь; по Святославѣ сынъ его Ярополкь, потомъ Владимирь, убивь Ярополка. По крещении же: по Владимерѣ Святополкь, сынь Владимеровъ; по немъ Ярославь, согнавь его. По смерти же Ярославли Владимеровича осташася 3 сыны его: Изяславъ, Святославъ, Всеволодъ, и раздѣлиша землю; взя болшии Изяславь Киевь, и Новогородъ и иные грады Киевскаго предѣла, а Святославь Черниговь и всю страну восточную и до Мурома, а Всеволодь Переяславь, Ростовь, и Суждаль, и Бѣлоозеро, и Поволжие; и убиша Изяслава на бою Половци. Святославь умре и сѣде Всеволодъ въ Киевѣ. По смерти его сѣде Святополкь Изяславичь. По смерти того сѣде Володимерь Манамахъ, сынь Всеволожь, и по немъ сынь его Мъстиславъ, а по смерти Мъстиславли братъ его Ярополкь; а по смерти Мьстиславли Володимеровича Манамахова сѣде Всеволодъ, сынь Олговь, и потомъ Вячеславь со Изяславомъ. По смерти же Изяславли Юрии Володимеричь Манамаховь Долгорукии, и прогнаша его, и сѣде Ростиславъ Мьстиславичь. О КНЯЗЕХЪ НОВОГОРОДСКЫХЪ, КОИ КНЯЖИЛИ ПО ВЕЛИКОМЪ ВОЛОДИМЕРѢ. По крещении прьвыи князь въ Новѣгородѣ Вышеславь Володимировичь, по немъ Ярославь Володимеровичь же. Ярославъ же бився съ Святополкомъ, по смерти отца своего, и одолѣ ему, и сѣде въ Киевѣ; посади въ Новогородѣ Константнна Добрынича. И родися у Ярослава сынъ Илиа, и посади его въ Новогородѣ, и умре; и разгнѣвася Ярославь на Константина и заточи его вь Ростовъ, а сына своего Вълодимера посади въНовогородѣ, и написа грамоту Новогородцомъ, рекь: «по сеи грамотѣ ходите». По смерти Владимеровѣ Ярославича, братъ его Изяславъ Ярославичь изъ Киева посади сына своего Мьстислава, и побѣдиша его.

Княжение Ярославле по смерти Святополъчи Владимеричевъ. Начатъ же Ярославъ воа дѣлити, старостамъ своимъ по 10 гривень, а смердомъ по гривнѣ, а Новогородцомъ 10 гривень, и отпусти а вся по домомъ; и давь Новогородцомъ правду и уставь, списавь грамоту, и рече: «по сему ходите и дрьжите, якоже списахь вамъ». Здѣ пишетъ судебникь великаго князя Ярослава Владимерича, и потомъ его дѣтеи: Изяслава, Святослава и Всеволода, и по нихь уставъ великого князя Владимира Всеволодича Манамаха, и потомъ царя Костантина великаго; язъ же сие преминухъ, множества ради.

Того же лѣта родися третии сынъ Ярославу, и нарече имя ему Святославъ.

Того же лѣта родися третии сынь Ярославу, и нарече имя ему Святославь.

В лѣто 6562 [1054]. Преставися великыи князь рускыи Ярославъ. Еще бо живу сущу ему, наряди сыны своя, рекъ имъ: «Се, азъ отхожю свѣта сего, сыновѣ мои; имѣите в себѣ любовь, понеже вы есте братьа единого отца и матери. Да еще будете в любъви межи собою, богъ будет в васъ, покорить вы противныя и будете мирно живуще. Аще ли будете ненавистьно живуще, въ распрях живуще и которающеся, то погыбнете сами, и землю отець своих и дѣдъ своих испустошите, иже бо онѣ налѣзоша трудомъ великымъ; то пребываите мирно, послушающе брат брата. Се же поручаю въ свое мѣсто столъ свои старѣишему сыну моему, брату вашему, Изяславу Кыевъ; сего же послушаите, якоже вы послушасте мене, да тъ вы будет въ мене мѣсто; а Святославу даю Черниговъ, а Всеволоду Переяславль, а Игореви Володимирь, а Вячеславу Смолнескъ». И тако рекши, раздѣли имъ грады; и заповѣда имъ не преступати брату въ предѣлъ братинь, ни сгонити, рекъ Изяслава: «Аще кто хощеть обидѣти брата своего, то ты помагаи, егоже обидять». И тако уряди сыны своя пребывати в любви. Самому же болну сущу и пришедшю Вышегороду, разболѣся велми, Изяславу тогда сущу, а Святославъ въ Володимери, Всеволоду же у во отца тогда: бѣ бо любимъ отцемъ паче всея братья, егоже имяше присно у себе. Ярославу же приспѣ конець житиа, и предасть душю свою мѣсяца февраля, в суботу 1 недѣли поста, на святого Федора. Всеволодъ же, спрятавъ тѣло отца своего, возложи на сани, повезоша Кыеву попове, поюще обычныя пѣсни; и плакашася по немъ людие плачемь велиимъ зѣло; и абие принесъше, положиша его в рацѣ мраморянѣ въ церкви святыя Софѣя; и плакася по немъ Всеволод и людие вси. Живе же всѣх лѣт 76.

В лѣто 6562 [1054]. Преставися великыи князь рускыи Ярослав. И еще бо живу сущу ему наряди сыны своа рекь имъ: "Се аз отхожу свѣта сего, сынове мои; имѣите в собѣ любовь, понеже вы есте братья единого отца и матере; да аще будете в любви межи собою, Богъ будет в вас и покорить вы противныа под вами, и будѣте мирно живуще; аще ли имѣте ненавистно жити в распрях и которающеся, то погыбнете сами и потеряете землю отець своихъ и дѣд своих, иже налѣзошя трудом своим великым; но пребываите мирно, послушающе брат брата. Се же, поручаю в себе мѣсто столъ мои старѣишему сыну моему, брату вашему Изяславу, Киев; сего же послушаите яко послушасте мене, да тот вам будет в мене мѣсто; а Святославу даю Чернигов, а Всеволоду Переяславль, а Игореви Володимирь, а Вячеславу Смоленескъ". И тако раздѣли им грады, заповѣдав имъ не преступати предѣла братня, ни изгонити, рек Изяславу: "Аще кто хощеть обидити брата своего, то ты помогаи, егоже обидят". И тако наряди сыны своя пребывати в любви. Самому же болну сущу, и пришедшу к Вышегороду, ту разболѣся велми, Изяславу сущу тогда ту, а Святославу в Володимери, а Всеволоду у отца, бѣ бо любим отцемь паче всея братия, егоже имяше присно у себе. Ярославу же приспѣ конець жития, и предася душю свою, месяца февраля 20, в суботу 1 неделю поста, на память святого Феодора. Всеволод же, спрятав тѣло отца своего, възложше на сани, повезоша к Киеву, попове поюще обычныа пѣсни; и плакашяся по немь Всеволод и людие вси; и принесше и положиша и в рацѣ мраморянѣ в церкви святыа Софиа. Житъ же всѣх лѣт 76.

В лѣто 6562[1054]. Преставися князь великии рускыи Ярославъ. И еще бо сущу ему живу, наряди сыны своя, рекъ имъ: «Се азъ отхожу свѣта сего, сынове мои. Имѣите в себѣ любовь, понеже вы есте братия единаго отца и матере. Да аще будете в любви межи собою, Богъ будеть въ васъ и покорить вамъ противная, и будете мирно живуще. Аще ли будете в ненависти живуще, въ распряхъ и которающеся, то погыбнете сами и потеряете землю отець своихъ и дѣдъ своихъ, иже налѣзоша трудомъ своимъ великимъ. Но пребываите мирно, послушающе братъ брата. Сего же послушаите, якоже послушаста мене, да тотъ вы будеть в мене мѣсто. А Святославу даю Черниговъ, а Всеволоду Переяславль, а Игореви Володимеръ, а Вечеславу Смоленескъ». И тако раздели имъ грады, заповѣдавъ имъ не преступати повелѣния братня, ни изгонити. Рекъ Изяславу: «Аще хощеть обидити брата своего, то ты помагаи, его же обидять». И тако поучивъ сыны своя пребывати в любви, самому же болну сущу, и пришедшу Вышегороду, разболѣся велми, Изяславу сущу тогда, а Святославу в Володимерѣ, а Всеволоду у отца, бѣ бо любимъ паче всея братьи, его же имяше присно у себе. Ярославу же приспѣ конець жития, и предасть душу свою месяца февраля 20, в суботу 1 неделю поста, на память святого великаго мученика Феодора Тирона. Всеволодъ же спрятавъ тѣло отца своего и везоша къ Киеву, попове поюще обычныя пѣсни, и плакашася по немъ вси людие, И Всеволодъ же принесе и положи в рацѣ мраморянѣ въ церкви Святыя София. Живъ же всѣх лѣт 76.

О ПРЕСТАВЛЕНИИ ВЕЛИКАГО КНЯЗЯ ЯРОСЛАВА ВЛАДИМЕРИЧА. Въ лѣто 6562 [1054]. Князь великии Ярославь прежде своеа смерти призва сыны своа, рече имъ: «Се азъ отхожу свѣта сего, сынове мои; имѣите межи собою любовь, понеже вы есте братиа единого отца и матери. Да аще будете въ любви между собою, Богъ будетъ въ васъ, и покорить вамъ противныя, и будете мирно живуще; аще ли будете въ ненависти живуще, въ распряхъ и которающеся, то погыбнете сами и потеряете землю отецъ вашихъ и дѣдъ вашихъ, иже налѣзоша трудомъ своимъ великымъ; но пребываите мирно живуще, послушающе братъ брата. Се же поручаю въ себе мѣсто столь свои старѣишому брату вашему, а своему сыну, Изяславу Киевь, сего же послушаите, якоже послушасте мене, да тотъ вы будетъ въ мене мѣсто; а Святославу Черниговь, а Всеволоду Переяславль, а Игореви Володимерь, а Вячеславу Смоленескь». И тако раздѣли имъ грады, заповѣдавъ имъ не преступати въ предѣлы братня, ни изгонити брату брата; и рече къ Изяславу: «Аще кто въсхощеть обидѣти брата своего, то ты помагаи, егоже обидятъ»; и тако поучивь сыны своа пребывати въ любви, и распусти ихъ. Самому же больну сущу, и пришедъ Вышегороду, разболѣся велми. Изяславу сущу тогда княжащу въ Туровѣ, а Святославу въ Володимери, а Всеволоду у отца; бѣ бо тои любимъ отцемъ паче всеа братии, егоже имяше всегда у себе. Ярославу же приспѣ конець житиа, и предасть душу свою мѣсяца февраля 20, въ суботу 1 недѣли поста, на память иже во святыхъ отца нашего Лва, папы Римскаго. Всеволодъ же спрятавь тѣло отца своего, и везоша его кь Киеву, попове поюще обычныа пѣсни, и плакашася по немъ вси людие; и привезше положиша его въ рацѣ мраморнѣ въ церквѣ святыа Софиа. Живъ же всѣхь лѣть 76.

Начало княжениа Изяславля в Киевѣ. В лѣто 6563 [1055]. Пришедши Изяславъ, сѣде в Киевѣ, а Святославъ в Черниговѣ, Всеволод в Переяславлѣ, а Игорь в Володимерѣ, Вячеславъ въ Смоленьскѣ.

Начало княжениа Изяславля в Киевѣ. В лѣто 6563[1055]. Пришед Изяслав, сѣде на столѣ в Киевѣ, а Святославъ в Черниговѣ, Всеволод в Переяславли, Игорь в Володимери, Вячеслав в Смоленсцѣ.

Начало княжения Изяславля в Киевѣ. В лѣто 6563[1055]. Пришедъ Изяславъ и сѣде на столѣ в Киевѣ, а Святославъ в Черниговѣ, Всеволодъ в Переяславлѣ, Игорь в Володимерѣ, Вечеславъ въ Смоленсцѣ.

НАЧАЛО КНЯЖЕНИА ИЗЯСЛАВЛЯ ЯРОСЛАВИЧА ВЪ КИЕВѢ. Въ лѣто 6563 [1055], кругь солнцу 12, а луны 9, индикта 11. Прииде Изяславь кь Киеву, и сѣде на столѣ отца своего въ Киевѣ, а Святославь вь Черниговѣ, Всеволодъ въ Переяславлѣ, Игорь Володимерѣ, Вячеславь въ Смоленьскѣ

В лѣто 6567 [1059]. Изяславъ, Святославъ, Всеволод высадиша строя своего Судислава князя ис поруба, сѣдивша лѣт 20 и 4, и приведоша его къ ротѣ и къ кресту, и бысть чернцомъ.

В лѣто 6567 [1059]. Изяслав и Святослав, и Всеволод высадишя строя своего Судислава ис поруба, сѣде бо лѣт 24 въ Псковѣ, зане водиша и к ротѣ, цѣлова крестъ; и бысть черньцем, и ведоша и в Киев.

В лѣто 6567 [1059]. Изяславъ и Святославъ, и Всеволодъ высадиша стрыя своего ис поруба, сѣдѣвъ лѣтъ въ Пьсковѣ 24, зане водиша и ротѣ, целова крестъ и бысть чернець, и ведоша его къ Киеву.

Въ лѣто 6567 [1059]. Князь великии Изяславь Ярославичь и братиа его Святославь и Всеволодъ высадиша стрыя своего Судислава ис поруба, сѣдившаго вь Пъсковѣ лѣть 24, заводиша его ротѣ, цѣлова кресть, и бысть чернецъ, и ведоша его кь Киеву.

Того же лѣта Изяславъ, Святославъ, Всеволод, Всеславъ совокупиша вои бещисла и поидоша на конех, в лодиях, бещисленое множество, на торкы. Слышавши же се торци, убояшася, пробѣгоша и до сего дни; помроша бѣгающе, гнѣвомъ божиимъ гоними: ови от зимы изомроша, другыи же гладомъ. Тако Богъ избави крестиянъ от поганых. Потом же ходи Изяславъ на сосолы и дань заповѣда даяти по 2000 гривенъ; они же поручьшеся и изгнаша даньникы; на весну же, пришедше, повоеваша села о Юрьевѣ, и город и хоромы пожгоша, и много зло створиша, и Плескова доидоша воююще. И изидоша противу имъ плесковицѣ и новгородци на сѣчю, и паде руси 1000, а сосолъ бещисла.

Того же лѣта Изяслав, и Святослав, и Всеволод, и Всеслав съвокупишя вои бесчисла и поидошя на коних и в лодьях безчисленое множество на торки. И се слышавше, торци пробѣгошя и до сего дне, и помрошя бѣгающе, Божиим гнѣвомь гоними; ови от зимы изомрошя, друзии же гладомъ, инии же моромъ и судом Божиим. И тако избави Богъ христиани от поганых.

Того же лѣта Изяславъ и Святославъ, и Всеволодъ, и Всеславъ совокупиша воя бес числа, и поидоша на коних и в лодияхъ бесчисленое множество на турки. Се слышавъше, турци пробѣгоша, и до сего дни, и помроша, бѣгающе, божиимъ гнѣвомъ гоними, ови от зимы и от глада изомроша судомъ божиимъ. И тако избави Богъ християнъ от поганыхъ.

Того же лѣта князь великии Изяславъ Ярославичь съ братиею Святославомъ Черниговскымъ и Всеволодомъ Переяславскымъ, и съ ними Всеславь Брячиславичь Полотьскыи, съвокупиша воа многы, и поидоша на конихъ и въ лодиахъ, бесчисленое множество, на торкы. Се слышавше Торци, пробѣгоша и до сего дня, и помроша бѣгающе, Божиимъ гнѣвомъ гоними, овии отъ зимы и отъ глада погыбоша судомъ Божиимъ; и тако избави Господь христиань отъ поганыхъ.

В лѣто 6573 [1065]. Иде Святославъ на Ростислава Тмутороканю. Ростиславъ же выступи кромѣ из града, не убоявъся его, нь не хотя противу строю своему оружиа взяти. Святославъ же пришед Тмютороканю, и посади пакы сына своего Глѣба, възратися опять. Ростиславъ же пакы пришед, выгна Глѣба; и прииде Глѣбъ ко отцу своему. Ростиславъ сѣде Тмуторокани.

В лѣто 6573 [1065]. Иде Святослав на Ростислава. Ростислав же отпусти кромѣ града, не убоявся его, но не хотя противу строеви своему оружия взяти. Святослав же, пришед къ Тмуторокани, посади пакы сына своего Глѣба и възвратися опять. Ростислав же, пришед, пакы выгна Глѣба, а сам сѣде в Тмуторокани; и приде Глѣбь къ отцу своему.

В лѣто 6573 [1065]. Иде Святославъ на Ростислава, Ростиславъ же отступи кромѣ града, не убоявся его, но не хотя противу стрыеви своему оружия взяти. Святославъ же, пришедъ Тмюторокани, посади сына своего Глѣба и възвратися опять. Ростиславъ же, пакы пришед, выгна Глѣба, а самъ сѣде Тмуторокани, и прииде Глѣбъ къ отцю своему.

Въ лѣто 6573 [1065]. Прииде Святославь Ярославичь съ сыномъ, княземъ Глѣбомъ, къ Томутороканю на Ростислава; Ростиславъ же выступи изъ града, и отъиде кромѣ, не убоявся, но не хотяше стати противу стрыа своего, ни оружиа взяти противу ему. Святославъ же пришедше Тмутороканю посади въ немъ сына своего Глѣба, и възвратися на столъ свои; Ростиславъ же опять пришедъ, выгна Глѣба изъ Тмуторокани, и сѣде самъ, Глѣбъ же иде кь отцу своему.

Того же лѣта князь Всеславь Полотцкии Брячиславичь взявъ Новьгородъ и пожже; а потомъ на 3-е лѣто побѣдиша Новогородци Всеслава. Бысть же сице: заратися Всеславь и взя Новгородъ, и пожже до Неровского конца; и поима все вь святѣи Софии, и паникадила и колоколы, отъиде. Ярославичи же трие, князь великии Изяславъ, и Святославъ, и Всеволодъ, съвокупиша вои, идоша на Всеслава Полотцкаго, зимѣ сущи велицѣ; и приидоша къ Менску, и Мениане затворишася въ градѣ; князи же взяша градъ Менескь и иссѣкоша мужи, а жены и дѣти даша на щитъ. И поидоша къ Немизи, и ту выиде противу ихь Всеславь, и сьвъкупишася обои на Немизѣ, марта 3 день, бѣ бо снѣгь великь, и поидоша противу себѣ; и бысть имъ бои великъ и сѣча зла, многы падоша, и одолѣша Ярославичѣ, а Всеславь побѣже. Посемь же, мѣсяца иуля въ 10 день, трие Ярославичи, князь великии Изяславъ, и Святославь и Всеволодъ, цѣловаша кресть кь Всеславу, и послаша къ нему, глаголюще: «Прииди къ намъ, яко не сътворимъ ти зла». Онъ же надѣяся на крестное цѣлование, иде къ нимъ на Ршу, поиха въ лодьи черезъ Днѣпрь. Изяславу же въ шатерь предъидущу, а Всеславу по немъ идущу, и яша Всеслава на Рши у Смоленска, преступивше кресть. Изяславъ же приведъ Всеслава кь Киеву, всади его въ порубь и съ двѣма сынома. Преступление крестное.

В лѣто 6575 [1067]. Заратися Всеславъ, сынъ Брячиславль, Полотьскыи, зая Новгород. Ярославици же трие, Изяславъ, Святославъ, Всеволодъ совокупиша воя, идоша на Всеслава, зимѣ сущи велицѣ, и прииде Мѣньску, и мѣнянѣ затворишася въ градѣ. Сиа же братьа взяша Мѣнескъ, исѣкоша мужи, а жены и дѣти взяша на щитъ; и поидоша к Немѣзи, мѣсяца марта въ 3 день, и бяше снѣгъ великъ, и поидоша противъ себѣ, и бысть сѣча зла, и мнози падоша; и одолѣша Изяславъ, Святославъ, Всеволодъ, а Всеславъ бѣжа. Посемъ же, мѣсяца июля въ 10 день, Изяславъ, Святославъ, Всеволод цѣловаша крестъ честныи ко Всеславу, рекше ему: «Прииди к намъ, яко не створим ти зла». Онъ же, надѣяся о цѣловании креста, приихавши в лодьи чресъ Днепръ. Изяславу же в шатеръ преди идущу, Всеславу по немь идущу, тако Всеслава яша на Рши у Смоленьска, преступивше крестъ. Изяславъ же приведе Всеслава Кыеву и всади его в порубъ съ двѣима сынъма.

В лѣто 6575 [1067]. Заратися Всеслав, сынь Брячиславль, Полотскыи и зая Новгород до Неревского конца и пожже; и поимав все у святѣи Софии, и паникадила, и колоколы, и отъиде. И Ярославичи же трие, Изяслав, Святослав, Всеволод, совокупивше вои, идошя на Всеслава, зимѣ сущи велицѣ. И приидошя к Менску, и меняне затворишася в градѣ. Си же взяше Каменескъ и изсѣкошя мужи, а жены и дѣти дашя на щит, и поидошя к Немизѣ, и Всеслав поиде противу. И съвокупишяся обои на Немизѣ марта въ 3 день, бѣ бо снѣг велик, и поидоша противу собѣ; и бысть сѣча, мнози падошя; и одолѣ Изяслав, и Святослав, и Всеволодъ, а Всеслав побѣже. По сем же, месяца июня 10, Изяслав, и Святослав, и Всеволод цѣловаше крестъ къ Всеславу, ркуще ему: Прииди к нам, яко не створим ти зла. Он же надѣяся о цѣлованьи креста, преѣха в лодьи чрез Днепръ, Изяславу же в шатеръ предъидущу, Всеславу же по нем идущу, и яша Всеслава на Рши у Смоленска, преступивше крестъ. И приведе Изяслав Всеслава к Киеву, всади и в порубь с двѣма сынома.

В лѣто 6575 [1067]. Заратися Всеславъ, сынъ Брячиславль, полотескыи и зая Новъгородъ до Неревьскаго конца, и пожже и поима все у Святѣи Софии, и паникадила, и колоколы, и отъиде. И Ярославичи же трие, Изяславъ, Святославъ, Всеволодъ, совокупиша вои и идоша на Всеслава, зимѣ суще велици, и приидоша къ Меньску, и меняне затворишася въ градѣ. Сии же князи взяша градъ Менескь и иссѣкоша мужи, а жены и дѣти даша на щитъ: и поидоша к Немизи, и Всеславъ поиде противу, и совокупишася обои на Немизѣ марта 3 день, бѣ бо снеѣгъ великъ, и противу поидоша себе, и бысть сѣча зла, многы падоша. И одолѣ Изяславъ и Святославъ, и Всеволодъ, а Всеславъ побѣже. По семъ же месяца июля въ 10 день Изяславъ и Святославъ, и Всеволодъ целовавше крестъ къ Всѣславу, ркуще ему: «Прииди к намъ, яко не створим ти зла». Он же, надѣявся о целовании креста, поѣде в лодии чрезъ Днѣпръ. Изяславу же въ шатеръ предъ идущу, а Всеславу же по немъ идущу, и яша Всеслава на Рши у Смоленьска, преступивше крестъ. Изяславъ же, приведъ Всеслава къ Киеву, всади в порубъ съ двѣма сынома.

В лѣто 6576 [1068]. Приидоша иноплеменници на Рускую землю, половци мнози; Изяславъ же и Святославъ и Всеволодъ изидоша противу имъ на Альто. И бывши нощи, поидоша противу себѣ; грѣхъ же ради наших попусти Богъ поганыя на ны, и побѣгоша рустѣи князи, и побѣдиша их половци. Наводит бо Богъ поганыя, по гнѣву своему, иноплеменьникы на землю, и тако скрушенымъ имъ, въспомянутся къ богу. Усобная же рать бываеть от сважениа диаволя. Богъ не хощеть зла въ человѣцѣхъ, но блага; а диаволъ радуется злому убииству, кровопролитью, въздвизая свары, зависти, братоненавидѣния, клеветы. Земли согрѣшивши коеи любо, казнить богъ смертью, или гладомъ, или наведениемъ поганых, или ведромъ, или гусиницею, или инѣми казньми. Аще ли покаявшеся будемь, в нем же ны богъ велит жити, глаголеть бо намъ пророкомъ: «Обратитеся ко мнѣ всѣмъ сердцемь вашимъ, постом и молитвою и плачемъ»; да аще сице створимъ, всѣх грѣхъ прощени будемъ. Нь мы на злое возвращаемся, акы свинья в калѣ грѣховнемъ валяющися, и тако пребываемъ. Тѣм же и пророкомъ к намъ глаголеть: разумѣхъ, рече, яко жестокъ еси, и шия желѣзныя выя твоя, того ради удержах от вас дождь, предѣлъ единъ одождихъ, а другаго не одождихъ, исъше; поразих вы зноемъ и различными казньми, то и тако не обратистеся ко мнѣ. Сего ради винограда вашего и смокви ваша, и нивы, и дубровы ваша истрохъ, глаголет господь, а злобъ ваших не могох истерти. Послахъ на вы различныя напасти и болезни, смерти тяжькы, на скоты казнь свою послах, то и тако не обратистеся ко мнѣ, нь рекосте: мужа есмя мы. Доколѣ не насытистеся злобъ вашихъ. Вы уклонистеся от пути моего, глаголеть господь, соблазнисте многы; сего ради буду свѣдѣтель скоръ на противныя и на прелюбодѣица, и на кленущая во лжу именемъ моимъ, и на лишающая мьзды наимникы, насильствующая на сироты и вдовиць, и накланяющая судъ кривѣ. Почто не сдерзаетеся о грѣсех ваших; нь уклонисте законы моя и не съхранисте их. Обратитеся ко мнѣ, обрящуся к вамъ, глаголеть господь; и азъ отверзу вамъ хляби небесныя, и возращу гнѣвъ мои от вас, дондеже все обилуеть вамъ; и не имуть изнемощи виногради ваши, ни нивы. Нь вы стяжасте на мя словеса тяжка, глаголюще: суетно работая богу; тѣм же усты чтуть мя, а сердце ваше далече отстоить от мене, глаголеть господь. Того ради ихже просим, не улучимъ: будет бо, рече, егда призовете мя, азъ же не послушаю вас. Възищете мене зли, и не обрящете; не въсхотѣша бо ходити по путемъ моимъ; да того ради затворяется небо, ово ли злѣ отверзается, въ дождя мѣсто пущаеть, ово ли сланою плоды ознобляя и землю зноемь томя, наших ради злобъ. Аще ли ся покаемъ о злобах своихъ, то акы чадом своимъ подаст богъ намъ вся прошениа, и одождить намъ дождь рань и позденъ, и наполнятся гумна наша пшеница, и пролиються точила винная и масличная; и воздамъ вамъ за лѣта, яже пояша прузи и хрустове и гусиница, сила моя великая, юже послах вамъ, глаголеть господь вседержитель. Си слышавше, въстягнемся на добро; взищете суда, избавите обидимаго; на покаяние приидемъ, не въздающе зла за зло, ни клеветы за клевету; нь любовию прилѣпимся господѣ бозѣ нашемъ, постомъ и рыданиемъ и слезами омывающи вся прегрѣшениа, не словомъ нарѣчающеся крестиянѣ, а поганьскы живуще. Се бо, не поганьскы ли живемъ, аще въ усряцю вѣруют; аще бо кто усрящеть черноризьца, то възращается, ни единиць, ли свинью: то не поганьскы ли есть то. Се бо по диаволю научению кобь сию творять. Друзии же зачиханию вѣруют, еже бываеть на здравие главѣ. Нь сими диаволъ льстить, и другыми нравы, всякыми лестьми, пребавляя ны от Бога, трубами, гусльми, русальями. Видѣмъ бо игрища утолочена и людии множество на них, яко упихати начнуть другъ друга, позоры дѣюща от бѣса замысленаго дѣла, а церкви стоять; егда же бываеть год молитвы, мало их обращаеться къ церкви. Да сего ради казни приемлемъ, казни грѣх ради нашихъ от бога всякыя и нахожение ратных по божию повелѣнию приемлемъ. Мы же на предлежащее возратимся. Пакы же Изяславу со Всеволодом Кыеву прибѣгшю, а Святославу Черьнигову, и людие киевьстѣи прибѣгоша Кыеву, и створиша вѣче на торговищи, и рѣша, пославше къ князю: «Се половци розошлѣся по земли; да вдаи, княже, оружие и конѣ, и еще биемся с ними». Изяславъ же сего не послуша. И начаша людие говорити на воеводу Коснячя; идоша с вѣча на гору, и приидоша на дворъ Коснячевъ, и не обрѣтше его, и сташа у двора Брячиславля, и рѣша: «Поидемъ, высадимъ дружину свою ис погреба». И раздѣлишася на двое: половину ихь иде къ погребу, а половина поидоша по мосту; сии же приидоша на княжь дворъ. Изяславу сѣдящу на сѣнех с дружиною своею, и начаша прѣтися съ княземъ, стояще долѣ. Князю изо оконца зрящу и дружинѣ стоящи у князя, и рече Тукы, брат Чюдинь, Изяславу: «Видѣши, княже, людие возлилися суть; пошли солъ, да блюдут Всеслава». И се ему глаголющю, другая половина людеи прииде от погреба, отворивше погребъ. И рѣша дружина князю: «Се зло есть, посли ко Всеславу, даждь призвавше къ оконцю, пронзуть его мечемъ»; и не послуша сего князь. И людье же кликнуша, и идоша къ порубу Всеславлю; Изяславъ же, се видѣвъ, со Всеволодомъ побѣгоста съ двора князя; и дворъ княжь разграбиша, бещесленое множество злата поимаша и сребра и кунами и скорою. Изяславъ бѣжа в Ляхы. Посем же половчемъ воюющимъ по землѣ Рустѣи, Святославу сущу в Черниговѣ, и половцемъ воюющим около Чернигова, Святославъ же собравъ дружины нѣколико, изиде на нѣх ко Сновьску. И узрѣша половци идущии вои, пристроиша вои противу. И видѣ Святославъ множество их, рче дружинѣ своеи: «Потягнемь, уже намъ нѣлзѣ камо ся дѣти»; и удариша в нѣ; и одолѣ Святославъ въ 3-хъ тысящах, а половець бѣ 12 тысяцѣ; н тако биеми, а друзии истопоша въ Снови; а князь их яша Шавокгракана въ 1 день ноября. И възвратишася с полономъ въ град свои Святославъ; Всеславъ же сѣде в Киевѣ. Се же богъ яви силу крестианьскую: понеже Изяславъ человавъ честныи крестъ, и изыма и; тѣм же наведе Богъ поганыя, сего же явѣ избави крестъ честныи. Въ день бо Въздвижениа Всеславъ, въздохнувъ, рече: «О кресте пресвятыи, понеже в тебе вѣровах, избави мя от рова сего». Богъ показа силу крестияньскую на показанье земли Рустѣи, да не преступають креста честнаго, цѣловавше; аще ли преступят, то и здѣ приимут казнь, и на приидущимъ вѣцѣ казнь вѣчную; понеже бо есть сила велика крестъная: крестомъ бо побѣжени бывають силы бѣсовьскыя, крестъ бо княземъ въ бранех, крестомъ бо огражаеми вѣрнии побѣжают супостаты противныя, крестъ бо въскорѣ избавляеть от напасти призывающимъ его с вѣрою; ничего же ся бѣси боять, токмо креста: аще бо бывают от бѣсовъ мечтаниа, знаменавше лице крестомъ, прогоними бывають. А Всеславъ сѣдѣ в Киевѣ мѣсяць 7.

В лѣто 6576 [1068]. Приидошя иноплеменници на Рускую землю, половци мнози; Изяслав, и Святослав, и Всеволод изыдошя противу им на Лто. И бывши нощи, подъидошя противу собѣ; грѣх же ради наших пусти Богъ на ны поганыа, и побѣгошя рустии князи пред половци; Изяславу же съ Всеволодом к Киеву прибѣгшу, а Святославу к Чернигову. И киевстии людие такоже прибѣгоша к Киеву, и створиша вѣче на тръговищи, и рѣша, пославшяся князю: Се, половци разсыпалися по земли; даи, княже, оружие и кони, и еще бьемся с ними. Изяслав же сего не послуша. И начашя людие его говорить на воеводу на Косняча; и идошя на гору с вѣча, и приидошя на дворъ Коснячков, и не обрѣтше его, и сташя у двора Брячиславля, и рѣшя: Поидемъ, высадимь дружину свою из погреба. И раздѣлишася надвое: половина их иде к погребу, а половина их до помосту; си же приидошя на княж дворъ. Изяслав же сѣдяше на сѣнех с дружиною своею; и начашя прѣтися съ князем, стоаще долѣ, князю же изъ оконца зрящу и дружинѣ стоящи у князя. И рече Туки, брат Чюдин, Изяславу: Видиши, княже, людие възвыли? Посли, аже Всеслава блюдут. И се ему глаголющу, другаа половина приде люди от погреба, отворивше погреб; и рѣша дружина князю: Се зло есть; посли къ Всеславу, и призвавше лестию къ оконцу, и пронзут его мечем. И не послуша сего князь. Людие же кликнушя, и идошя к порубу Всеславлю; и Изяслав, се видѣв, съ Всеволодом побѣгоста з двора. Людие же высѣкоша Всеслава ис поруба 15 септевря, и поставиша его посреди двора княжа, и дворъ княж разграбишя, безсчисленое множество злата и сребра и кунами и бѣлью: Изяслав же бѣжа в Ляхи. По сем же половцемъ воюющем по земли Рустии, Святославу же сущу в Черниговѣ, а половцем воюющем около Чернигова, Святославъ же събрав дружинѣ нѣколико, изыде на ня къ Оснувску. И узрѣша и половци идуща, и пристроишася противу; и видѣв Святослав множество их, рече дружинѣ своеи: Потягнем, уже нам нѣкамо ся дети. И удариша в кони, и одолѣ Святослав в трех тысящах, а половець 12000, и тако бьеми, а друзии потопиша в Снови, а князя их яша рукама, ноября 1. И възвратися Святослав с побѣдою в град свои, Всеслав же сѣде в Киевѣ. Се же, Богъ яви силу крестную, зане Изяслав цѣлова крестъ и поимаша и; тѣм же наведе Богъ поганыя, сего же явѣ избави крестъ честныи. В день бо Въздвижениа Всеслав въздохнув, рече: О, кресте честныи! Понеже в тебе вѣровах, избави мя от рва сего! Богъ же показа силу крестную на показание земли Рустѣи, да не преступают честнаго креста, цѣловавше его; аще преступит кто, тои здѣ приимет казнь, и на приидущем вѣцѣ казнь вѣчную приимет, зане велика есть сила крестнаа. И сѣде Всеславъ в Киевѣ месяць 7.

В лѣто 6576 [1068]. Приидоша иноплеменници на Рускую землю половци мнози. Изяславъ и Святославъ, и Всеволодъ изыдоша имъ противу на Лто, и бывши ночи, предъ идоша противу себе, грѣхъ ради нашихъ пусти Богъ на ны от половець поганыхъ, и побѣгоша рустии князи, а Изяславу же съ Всеволодомъ къ Киеву прибѣгъшу, а Святославъ къ Чернигову. И людие киевьстии прибѣгоша къ Киеву и створиша вече на торжищи, и рѣша, пославшеся къ князю: «А се половци рассулися по земли. Даи, княже, оружие и кони, и еще биемся с ними». Изяславъ же сего не послуша. И начаша людие его воротитина воеводу, на Косняча, идоша на гору с вѣча и приидоша на дворъ Коснячевъ, и не обрѣтше его, сташа у двора Брячиславля и рѣша: «Поидемъ, высадимъ дружину свою ис погреба». И разделишася надвое, половина ихъ идеть къ погребу, а половина ихъ идеть по мосту. Сии же приидоша на княжь дворъ, Изяславъ же сѣдяаше на сѣнехъ с боляры своими, и начаша прѣтися съ княземъ, стояще долѣ, князю изъ оконцю зрящу, а боляре стояще у князя. Рече Туки, брат Чюдинъ Изяславу: «Видиши, княже, людие възвысися. И посли, атъ Всеслава блюдуть». И се ему глаголющи, другая половина людии прииде от погреба, оттворивше погребъ. И рѣша 45-князю боляре: "Се зло есть. Посли къ Всеславу, атъ, призвавши лестию къ оконцю, прознуть и мечемъ". И не послуша сего князь. Людие же кликнуша и идоша къ погребу Всеславлю. Изяславъ же, се видѣвъ, со Всеволодомъ побѣгоста съ двора. Людие же высѣкоша Всеслава ис погреба въ 15 сентября и поставиша и посреди двора княжа, и дворъ княжь разграбиша, бесчисленоея множество злата и сребра, и кунами, и бѣлию. Изяславъ же бѣжа в ляхи. По сем же половцемъ воюющимъ по земли Рустѣи, Святославу сущу в Черниговѣ, и половцемъ воюющимъ около Чернигова, Святославъ же собравъ дружины нѣколико, и изыде6на ня къ Сновьску. И узрѣша и половци идуща, бои пристроиша противу. И видѣвъ Святославъ и множество ихъ, рече дружинѣ своеи: "Потягнемъ, братие, уже намъ нелзѣ камо ся дѣяти". И удариша в кони, и одолѣ Святославъ въ 3000, а половець бѣ 12000. И тако биеми, а другия потопоша въ Снови, а князя ихъ яша рукама въ 1 ноября. И възвратися с побѣдою въ градъ свои Святославъ. Всеславъ же сѣде в Киевѣ. Се же яви силу крестную господь Богъ нашь, зане Изяславъ, целовавъ крестъ, и я его, тѣм же наведе Богъ поганыя. Сего же явѣ избави крестъ честныи. Въ день Въздвижения Всеславъ, въздохнувъ, рече: «О кресте честныи! Понеже в тебе вѣровах, избави мя от рва сего». Богъ же показа силу крестную на показание земли Рустѣи, да не преступаютъ честнаго креста, целовавше его. Аще преступить кто, тои здѣ прииметь казнь и на предъидущемъ вѣцѣ казнь вѣчную прииметь, зане велика есть сила крестная. И сѣде Всеславъ в Киевѣ 7 месяць. И иде владыка Стефанъ въ Киев, и тамо свои холопи удавиша его.

Въ лѣто 6576 [1068]. Приидоша иноплеменници, мнози половци, на Русскую землю, князь же великии Изяславь и братиа его Святославь и Всеволодъ изыдоша противу имъ на Алто; и бывши нощи, поидоша противъ себе, грѣхъ ради нашихъ пусти Богъ на ны половець поганыхъ, и побѣгоша русстии князи. Великому князю Изяславу кь Киеву прибѣгшу, а Святославъ кь Чернигову, и людие киевстии прибѣгоша кь Киеву, и сътвориша вѣче на торжищи, и рѣша, пославшеся кь князю Изяславу: «А се половци разсунулися по земли; даи, княже, оружие и кони, еще биемся съ ними». И не послуша ихъ Изяславь. И начаша людие говорити на воеводу на Косняча; и идоша на гору съ вѣща, и приидоша на дворъ Коснячевь, и не обрѣтше его, сташа у двора Брячислава, и рѣша: «поидеиъ, высадимъ дружину свою ис погреба». И раздѣлишася на двое: половина ихъ иде кь погребу, а половина ихъ иде по мосту; сии же приидоша на великого князя дворь. Великому князю Изяславу сѣдящу на сѣнехъ съ боляры своими, и начаша Киане претися съ великымъ княземь. Стоащемъ долѣ, князио великому изь оконца зрящу, а боляре стояще у князя, рече Тукы, братъ Чудинь, великому князю: «видиши ли, княже, людие възвыли ; посли, даждь Всеслава блюдуть». И се ему глаголющу, другаа половина людии прииде отъ погреба, отворивше погребь и Всеслава высадиша. И рѣша боляре великому князю: «Се зло есть; посли кь Всеславу, да призвавши сего кь оконцу лестию, и пронзутъ его мечемь;» и не послуша сего князь великии. Людие же кликнуша, и идоша кь погребу Всеславу; князь же великии се видѣвь, съ Всеволодомъ побѣгоста з двора , людие же высѣкоша Всеслава ис погреба, 15 сентебра, и поставиша его посредѣ двора великого князя, и дворъ великого князя разграбиша, бесчисленое множество злата и сребра, и кунами и бѣлию. Князь же великии Изяславь бѣжа въ Ляхы кь шуринову сыну, къ Болеславу. Посемь же половцемъ воюющимъ по земли Русстѣи, Святославу сущу въ Черниговѣ, и половцемь воюющимъ около Чернигова, Святославъ же събравь дружины нѣколико , изыиде на ня кь Сновску; и узрѣша и Половци идуща, бои пристроиша противу. И видѣвь Святославь множество ихъ, рече дружинѣ своеи: «потягнемъ, братии; уже намъ нелзѣ дѣти камо ся.» И удариша въ кони, и одолѣ Святославь въ трехъ тисящахъ, а половець бѣ 12,000, и тако биеми, а другыа истопоша въ Снови, а князя ихъ яша руками, въ 1 ноебря; и възвратися Святославь Ярославичь съ побѣдою въ градъ свои Черниговь. Всеславъ же Брячиславичь сѣде въ Киевѣ. Се же яви Господь Богъ нашь силу крестную, зане князь великии Изяславъ цѣловавь кресть и я Всеслава, тѣмже наведе Богь поганыа, сего же явѣ избави кресть честныи: въ день бо Въздвижениа Всеславь въздхнувь, и рече: «о кресте честныи! понеже въ тебе вѣровахъ, избави мя отъ рова сего». Богъ же показа силу крестную на показание земли Русстѣи, да не преступають честнаго креста, цѣловавше его; аще ли преступитъ кто, то и здѣ прииметъ казнь, и на предъидущимъ вѣцѣ муку вѣчную прииметъ, зане велика есть сила крестнаа. И сидѣ Всеславъ вь Киевѣ 7 мѣсяць. Того же лѣта иде владыка Стефань Новогородскии въ Киевъ, и тамо свои холопи удавиша его.

В лѣто 6577 [1069]. Поиде Изяславъ с Болеславомъ на Всеслава; Всеславъ же поиде противу; прииде к Бѣлугороду Всеславъ, бывши нощи, и утаивъся киянъ, бѣжа из Бѣлагорода Полотьску. Заутра же видѣша людие бѣжавша князя, възратишася къ Кыеву, и створше вѣче, послаша къ Святославу и ко Всеволоду, глаголюще: «Мы уже зло створилѣ есмы, князя своего прогнавше; а се ведеть на нас Лятьскую землю; а вы поидита въ град отца своего; аще ли не хощета, то намъ неволя: зажегше град свои, ступимъ в землю Грѣчьскую». И рече имъ Святославъ: «Вѣ пошлевѣ брату своему; да аще поидет на вы с ляхы губити васъ, то вы противу ему ратью, не дадивѣ убо погубити града отца своего; аще ли хощеть с миром, то в малѣ приидет дружинѣ». И утѣшиста кыянѣ. Святославъ же и Всеволод посласта къ Изяславу, глаголюща: «Всеславъ ти бѣжалъ; а ты не води ляховъ къ Кыеву, противна ти нѣту; аще ли хощеши гнѣвъ имѣти погубити град, то вѣси, яко намъ жаль ти есть отня стола». То слышавъ Изяславъ, остави ляхы, поиде с Болеславомъ, мало ляховъ поимъ; посла же пред собою сына своего Мьстислава къ Кыеву. И пришед Мьстиславъ, исѣче, иже бѣша высѣклѣ Всеслава, числомъ 70 чади; а другиа слѣпиша, иныя же безъ вины погуби, не испытавъ. Изяславу же, идущу къ граду, изидоша людье противу с поклономъ, и прияша князь свои кыянѣ; и сѣде Изяславъ на столѣ своемъ мѣсяца маия въ 2 день, распуща ляхы на покормъ, и избиваху ляхы отаи. И возратишася Болеславъ в землю свою. Изяслав же взя торогъ на гору; и прогна Всеслава ис Полотьска, и посади Мьстислава, сына своего, в Полотьскѣ, иже въскорѣ умре ту; и посади в него мѣсто брата его Святополка, а Всеславу бѣжавшю.

В лѣто 6577 [1069]. Поиде Изяслав с Болеславом на Всеслава; Всеслав же поиде противу; и приде к Бѣлуграду, бывши нощи, утаився кианъ, и бѣжа из Бѣлаграда к Полотску. Заутра же, видѣвше людие бѣжавша князя, възвратишася к Киеву и створше вѣче, послашяся к Святославу и къ Всеволоду глаголюще: "Мы уже зло створили, князя своего прогнавше, а сеи ведет на ны Лятскую землю; и вы поидета въ град отца своего; аще ли не хощета, то нам неволя: зажегше град свои ступим в землю Греческую. И рече имъ Святослав: "Мы послевѣ къ брату своему; да аще поидет на вы с ляхы убити вас, то мы противу его ратью идем, не давѣ бо погубити града отца своего; аще ли хощет прити с миромъ, то в малѣ приидет дружинѣѣ". И утѣшиста кианы. Святослав же и Всеволодъ послаша къ Изяславу, глаголюще: "Всеслав ти бѣжал, а ты не води ляхов к Киеву, противна ти нѣсть; аще ли хощеши гнѣвъ имѣти и погубити град, то вѣси, яко нам жаль отня стола". То слышав Изяслав, остави ляхы, поиде с Болеславом, мало ляхов поем. Посла же пред собою сына своего Мстислава к Киеву, и пришед Мстислав, и изсѣче еже бышя высекли Всеслава числом 70 чяди, а другыя ослѣпи, а ины без вины погуби, не испытав. Изяславу же идущу к граду, и изыдошя людие с поклономъ против и посадишя князь свои в Киевѣ, и сѣде Изяслав на столѣ своем, месяца маиа 2 день. И роспусти ляхы на покормъ, и избиваху ляхи отаи; и възвратися в Ляхы Болеслав в землю свою. Изяслав же възъгна торгъ на гору, и прогна Всеслава ис Полотска, и посади сына своего Мстислава, иже скоро умре ту; и посади в него мѣсто брата его Святоплъка; Всеслав же бѣжа.

В лѣто 6577 [1069]. Поиде Изяславъ съ Болеславомъ, Всеславъ же поиде противу. И прииде къ Бѣлугороду Всеславъ, и бывши нощи, утаився киянъ, бѣжа изъ Бѣлагорода к Полотеску. Заутра же видѣвше людиев бѣжавша князя, възвратишася къ Киеву и створиша вѣче, и послаша къ Святославу и къ Всеволоду, глаголюще: «Мы уже зло створили есмы, князя своего прогнавше, а сеи ведеть на нас Лятьскую землю. А поидѣта въ градъ отца своего. Аще ли не хощете, то намъ неволя, зажегъже градъ свои, ступимъ в землю Греческую». И рече Святославъ имъ: «Послевѣ къ брату своему. Да аще поидеть на вы с ляхи губить васъ, то мы противу ему ратию идемъ. Не дамы бо погубити града отца своего. Аще ли хощеть приити с миромъ, то въ малѣ приидеть силѣ». И утѣшиста кияны Святославъ и Всеволодъ, посласта къ Изяславу, глаголюще: «Всеславъ ти бѣжалъ. А не води ляховъ къ Киеву, противна ти нѣту. Аще ли хощеши гнѣвъ имѣти, погубити градъ, то вѣси, яко намъ жаль отца своего стола». То слышавъ, Изяславъ остави ляхи, поиде с Болеславомъ, мало ляховъ поим, пославъ же предъ собою сына своего Мьстислава къ Киеву. И пришедъ Мьстиславъ, и иссѣче, ижа быша высѣкли Всеслава, числомъ 70 мужь, а другыя слѣпи, а иныхъ погуби, не испытавъ. Изяславу же идущу къ граду, изидоша людие с поклономъ противу и посадиша князь свои в Киевѣ, и сѣде Изяславъ на столѣ своемъ месяца маия въ 2 день. И распусти ляхи на покормъ, и избивааху ляхи отаи, и възвратися в Ляхи Болеславъ, въ землю свою. Изъславъ же възгна торгъ на гору. И прогна Всеслава ис Полотеска, и посади сына своего Мьстислава в Полотескѣ, иже скоро умре ту, и посади ту въ его мѣсто брата его Святополка. Всеславъ же бѣжа.

Въ лѣто 6577 [1069]. Поиде князь великии Изяславъ сь Болеславомъ Лятскымъ на Всеслава, Всеславъ же поиде противу; и прииде Всеславь кь Бѣлугороду, и бывши нощи, утаився киань, бѣжа изъ Бѣлагорода кь Полотьску. Заутра же видѣвше людие бѣжавша князя, възвратившеся ко Киеву и сътворивше вѣче, послаша кь Святославу въ Черниговь и кь Всеволоду въ Переяславль, глаголюще: «Мы зло сътворихомъ князю своему, прогнавше его, а се и ведетъ на ны Лятскую землю; а поидѣта въ градъ отца своего; аще ли не хощете, то намъ неволя: зажегше градь свои, ступимъ вь Греческую землю». И рече имъ Святославь: «Послевѣ кь брату своему, да аще поидетъ на вы съ ляхы погубиты васъ, то мы противу ему ратию идемъ, не дамы бо погубити града отца своего; аще ли хощеть приити съ миромъ , то въ малѣ приидетъ силѣ». И утѣшиста кианы. Святославъ же и Всеволодъ посласта кь брату Изяславу, глаголюще: «Всеславь ти бѣжалъ, а не води ляховъ кь Киеву: противня ти нѣту; аще ли хощеши гнѣвь имѣти, погубити градъ, то вѣси, яко намъ жаль отца своего стола». То слышавъ Изяславъ, оставы ляхы, поиде съ Болеславомъ, мало ляховъ поимь; посла же предъ собою сына своего Мьстислава кь Киеву. И пришедъ Мъстиславь, и исѣче, иже быша высѣкли Всеслава, числомъ 70 мужъ, а другыа слѣпи, инымъ носы рѣза, а иныхъ погуби не испытавь. Великому же князю Изяславу идущу кь граду, изыидоша людие съ поклономъ противу, и посадиша князь свои въ Киевѣ; и сѣде князь великии Изяславь на столѣ своемъ, мѣсяца маиа 2 день. И распусти ляхы на покормь, и избивааху ляхы отаи, и възвратися Болеславь въ Ляхы, въ землю свою. Изяславъ же възгна торгь на гору; и шедъ прогна Всеслава ис Полотцка, и посади сына Мьстислава въ Полотску, онъ же скоро ту умре; и посади въ него мѣсто другаго сына своего Святополка; Всеславъ же бѣжа.

И бывши единою скудости в Ростовьстѣи области, въстаста два волъхва от Ярославля, глаголюща, яко «Мы свѣмы, кто держить обилье в себѣ». И пакы поидоста по Волзѣ; гдѣ приидоста в погостъ, и ту нарицающа лучьшая жены и глаголюща, яко сия жена жито держить, и сия медъ, а си рыбы, и сия же скору. И привожаху к нима сестры своя и матери и жены своя; онѣма же мечтаниемь своимъ прорѣзавше за плечима, и вынимаста любо жито, или рыбу, или веверицю; и убивашета многы жены, и имѣниа их взимашета собѣ. И приидоста на Бѣлоозеро, и бѣ у нею людии 300. В се же время приключися приити от Святослава Яневи, сыну Вышатину, сбирати данѣ. Повѣдаша же ему бѣлозерци, яко «Суть у нас два кудесника и избиша многыя жены по Волзи, по Шекъшнѣ и нонѣ приидоста сѣмо в нашю землю». Янь же, испытавъ, чья еста смерда, и увѣдавши ясно, яко суть князя Святослава, и сице пославши к ним, и рече иже суть около двою кудесникъ: «Выдаите ми волхва та сѣмо, яко тѣи суть смердѣ моего князя». Они же сего не послушаша. Янь же поиде самъ безъ оружья, и рѣша ему отроцѣ его: «Не ходи безъ оружья, исъсоромять тя». Он же повелѣ отрокомъ своимъ взяти оружие, и бѣ с нимъ 12 отрок, и се пакы поиде к нимъ к лѣсу. Они же сташа, исполцившеся, противу; а Яневѣ же идущу с топорцемъ, и выступиша от нихъ трие мужи, и приидоша къ Яневѣ, и сице глаголюще ему: «Видя идеши на смерть, не ходи». Оному же повелѣвшю бити я, къ прочимъ поиде. Они же сунушася на Яня, и единъ от них грѣшися Яня топоромъ; а Янь же, оборотя топоръ, удари тыльемъ, и абие повелѣ отрокомъ сѣщи их; они же бѣжаша в лѣсъ, и убиша ту попина Янева. Янь же, вшед въ град къ бѣлозерчемъ, и рече имъ: «Аще не имете волхву сею, не иду от васъ за лѣто». Бѣлозерци же, шедши, яша их и приведоша к нему. И рече има: «Что ради толко погубиста человѣкъ». Онѣма же рекшима, яко «Ти держать обилье; да аще истребивѣ и избѣваемъ сих, и будеть гобиино; аще ли хощеши, то пред тобою выимевѣ жито, или рыбу, или иное что». Янь же рече имъ: «Поистиннѣ лжета: створилъ бо есть Богъ человѣка от земля, съставленъ костьми и жилами и от крове, и нѣсть в немъ ничтоже, и не вѣсть ничтоже, токмо Богъ единъ вѣсть». Она же рекоста: «Вѣдаемъ, како есть человѣкъ створенъ». Он же рече: «Како». Она же ркоста: «Богъ мывъся в мовницѣ, и въспотѣвъ отреся вехтемь, и сверже и съ небеси на землю; и разъпрѣся сатана с богом, кому в немъ створити человѣка, и створи диаволъ человѣка, а богъ душю в него вложи; тѣм же аще умрет человѣкъ, и в землю идет тѣло, а душа къ богу». И рече има Янь: «По истинѣ прельстилъ вы есть бѣсъ; коему богу вѣруета». Она же рекоста: «Антихьсту». Он же има рекъ: «То гдѣ есть». Она же ркоста: «Сѣдить въ безъднѣ». «То кыи то Богъ, сѣдяи въ безднѣ; то есть бѣсъ; а Богъ есть, сѣдяи на престолѣ на небеси, славимъ от аггелъ, иже предстоять ему съ страхомъ, не могуще на нь зрѣти; и сих бо аггелъ сверженъ бысть, егоже вы глаголета антихьста, за величание его сверженъ бысть съ небесѣ, и есть въ безднѣ, якоже вы глаголета, жьда, егда приидеть богъ съ небесѣ, сего имъ антихъста свяжеть узами и посадить во огнѣ вѣчномъ съ слугами его, иже к нему вѣрують; вамъ же и здѣ мука прияти от мене, и по смерти тамо». Онѣма же рекшима: «Нама бозѣ повѣдають: не можеши нама створити ничтоже». Он же рече имъ: «лжют вамъ бозѣ». Они же ркоста: «намъ пред Святославомъ стати, а ты намъ не можеши створити ничтоже». Янь же повелѣ бити ихъ и поторгатѣ брадѣ ею. Симь же пакы биенымъ суще и брадѣ поторгаеми проскипомъ, и рече има Янь: «что вамъ бозѣ молвят». Онѣм же тако рекшимъ: «Стати намъ пред Святославомъ». И абие повелѣ Янь вложити рубля въ уста има и привязати ихъ къ упругомъ, и пусти пред собою в лодьи, а самъ по них поиде; и ста на усть Шекъсны. И рче има Янь: «Что вамъ бозѣ молвят?» Она же повѣдаста: «Cице намъ молвят: не быти намъ живымъ от тебе». И рече има Янь: «То ти право повѣдають». Она же рекоста: «Аще наю пустиши, много ти добра будеть; аще ли нас не пустиши, многу печаль приимеши и зло». Он же рече: «Аще вас пущу, то зло ми будет от бога; аще ли вас погублю, то мьзда ми от бога будет». И рече Янь къ повозникомъ: «Чи кому васъ кто родинъ убиенъ от сею». Они же глаголаша: «Мнѣ мати, другому сестра». Он же рече: «Мьстите своих». Они же поимше, убиша я и повѣсиша их на дубѣ; отместие приимше от Бога по правдѣ. А Яневѣ идущи къ домовѣ своему, и въ другую нощь медвидь възлѣзъ, угрызъ, снѣсть их; и тако погыбнуста бѣсовьскымъ наущениемъ, инѣмъ видяща и гадающа, а своея пагубы не вѣдуще. Аще быста вѣдала, то не быста пришла на мѣсто се, идеже изимана быста; аще ли ята, то почто глаголата: «не умрети нама», оному мыслящу убити я. Нь се есть бѣсовьское наущение; бѣси бо не вѣдят мысли человѣческыя, но влагають помыслъ въ человѣка, а таины не свѣдуще. Богъ же единъ свѣсть помышлениа человѣческа, бѣси бо не свѣдают ничтоже; суть бо немощнѣ и худѣ взоромъ. Яко и се скажемъ о взорехъ и омрачениих.

Бывши бо единои скудости в Ростовстѣи области, встаста два влъхва от Ярославля, глаголюще, яко: Мы свѣмы, кто обилье дръжит. И поидоста по Волзѣ. И где приидошя в погостъ, ту же лучшаа жены нарицающе, глаголаста, яко Си жито дръжат, а си мед, а си рыбы, а си скору. И привожаху к нима сестры своя, матери и жены своя; она же мечты прорѣзываше за плечима, вынимаста любо жито, ли рыбу, ли вѣверицу; и убивашеты многы жены, и имѣние их имашета за ся. И приидоста на Бѣлоозеро. И бѣ у нею люди инѣх 300. В се же лѣто ключися прити от Святослава дань емлюще Яневи, сыну Вышатину. Повѣдашя ему бѣлозерци, яко два кудесника избили уже многы по Волзѣ и по Шокъснѣ, и пришла еста сѣмо. Янь же, испытав, чья еста смерди, увѣдавъ, яко своего князя, послав к ним, иже около его суть, рече им: Выдаите влъхвы тѣ сѣмо, яко смерда еста моа и моего князя. Они же сего не послушашя. Янь же поиде сам и без оружиа, и рѣшя ему отроцы его: Не ходи без оружиа, осрамят тя. Он же повелѣ взяти оружие отроком, и бѣста 12 отрока с нимъ, и поиде к нимь к лѣсу. Они же сташа, исплъчившеся, противу; Яневи же идущу с топорком, выступиша от них 3 мужи, приидошя кь Яневи, ркуще ему: Видя идеши на смерть, не ходи. Оному же повелѣвшу бити а, и к прочимъ же поиде. Они же сунушася на Яна; единъ грѣшися Яня топором; Янь же обратив топоръ, удари тыльем, повелѣв отроком изсѣчи я; они же бѣжашя в лѣсъ, убиша же ту попина Янева. Янь же, шед в град к бѣлозерцем, рече имъ: Аще не имете влъхву сею, не иду от вас и за лѣто. Бѣлозерци же, шедше, яша их и приведошя къ Яневи. И рече им: Что ради погубиста толико человек? Онима же рекшема: Яко ти дръжат обилье; да аще истребим всѣх, будет гобино; аще хощеши, то пред тобою вымем жито, или рыбу, или ино что. Янь же рече: По истинѣ лжете; створил бо Богъ человека от земля, съставлена костьми и жилами и от крове; и нѣсть в немь ничтоже, и не вѣсть ничтоже, но токмо Богъ един вѣсть. Она же ркоста: Мы вѣдаевѣ, како есть человекь створен. Он же рече: Како? Она же ркоста: Богъ мывся в мылнѣ и въспотися, и отреся вехтем, и сверже с небесѣ на землю; и распрѣся сотона с Богомъ, кому в нем створити человека, и створи диавол человека, а Богъ душу в онь вложи; тѣм же аще умрет человекь, в землю идет тѣло, а душа идет к Богу. Рече же има Янь: По истинѣ прелстилъ есть вас бѣсъ; коему Богу вѣруета? Она же ркоста: Антихристу. Он же рече има: То где есть? Она же ркоста: Сѣдит в безднѣ. Рече има Янь: То кыи то Богъ сѣдит в бѣздне. То есть бесъ, а Богъ сѣдить на небеси, сѣдяи на прѣстоле, славим от ангелъ, иже предстоят ему съ страхом, не могуще на нь зрѣти; а сих бо ангелъ съвръженъ бысть, егоже вы глаголите антихриста, за величание его свержен бысть с небесе и есть в безднѣ, якоже вы то глаголете, ожидая, егда снидеть Богъ с небеси; сего имъ антихриста свяжет узами и посадить и въ огни вѣчнем съ слугами его, и иже к нему вѣруют; вама же и зде приати мука от мене, и по смерти тамо. Онѣма же, рекшима: Нама бози повѣдают: не можеши нам створити ничтожеѣ. Он же рече има: Лжут вама бози. Она же ркоста: Нам стати пред Святославом в Киевѣ, а ты нам не можеши створити ничтожеѣ. Янь же повелѣ бити я и потръгати брадѣ ею. Сима же бьющема, и брадѣ ею потръганѣ проскѣпомъ, рече има Янь: Что вама бози млъвят? Онѣма же рекшема: Стати нама пред Святославом. И повелѣ Янь вложити рубль въ уста ею и привязати ею къ упругу, и пусти пред собою в лодьи, и сам по них поиде. И сташя на усть Шокъсны; и рече има Янь: Что вама бози млъвят? Они же рѣша: Сице нама бози млъвят: не быти нама живыма от тебе. И рече има Янь: То вам право повѣдали. Она же рекоста: Но аще наю пустиши, много ти добра будет; аще наю погубиши, то многую печаль приимеши и зло. Он же рече: Аще ваю пущу, то зло ми будет от Бога; аще ли ваю погублю, то мзда ми будет от Бога. И рече Янь к повозникомъ: Чи кому вамъ кто родин убьенъ от сею? Они же рѣша: Мнѣ мати. Другому же сестра, иному рожение. Он же рече имъ: Мстите своих. Они же поемше убиша я, и повѣсиша на дубѣ, отместье приимше от Бога по правдѣ. Яневи же идущу домови, в другую нощь медвѣдь угрызе я и снѣсть; и тако погыбнуста наущениемь бѣсовскымь, инѣмь вѣдуще и гадающе, а своеа пагубы не вѣдущи. Аще быста вѣдали, то не быста пришла на мѣсто се, идѣже ятыма има быти; и аще ли и ята быста, то почто глаголаста: Не умрети нам. Оному мыслящу убити я. Но се есть бѣсовское наущение; бѣси бо не вѣдают мысли человечьскыа, но влагают помыслъ въ человека, таины несвѣдуще. Богъ же единъ, свѣсть помышлениа человечьскаа, бѣси же не свѣдают ничтоже, суть бо немощни и худи взором. Яко и се скажем о взорех ихъ и о немощи и о омрачении их.

Бывши единою скудости в Ростовьстѣи области, и въстаста два волхва от Ярославля, глаголюще, яко «мы вѣдаемъ, кто обилие дръжить». И поидоста по Волзѣ. Гдѣ приидоста въ погостъ, ту же нарицааху лучая жены, глаголюща, яко сии жито дръжать, а сии медъ, а сии рыбы, а сии скору. И привождааху к нима сестры иж своя и матери, и жены своя, они же в мечтѣ прорѣзаша за плечема, вымоваста любо жито, любо рыбы, или виверицю и убивашеть жены тѣ многы, а имѣния ихъ възимахуть себѣ. И приидоста на Бѣлоозеро, и бѣ у нихъ людеи 300. В се же время ключися приити от Святослава, дань емлюще, Яневи, сыну Вышатину. И поведаша ему бѣлозерци, яко два кудесника избили уже много женъ по Волзѣ, по Сокъшьнѣ и пришла еста сѣмо. Янъ же, испытавъ, чья еста смерда, и увѣда, яко его ему князя, пославъ к нимъ, иже около ею суть, и рече к нима: «Выдаите сѣмо вълхва та, яко смерда моего князя и моя». Они же сего не послушаашеся. Янь же поиде самъ безъ оружия, и рѣша ему отроци его: «Не ходи безъ оружия, изъсоромять тя». Он же повелѣ отроком своимъ взяти оружие. И бѣ 12 отрокъ его с нимъ, и поиде к нимъ к лѣсу, они же сташа, исполчившеся противу, а Яневи же идущу с топоркомъ. И выступиша от нихъ 3 мужи, глаголюще Яневи: «Видя идеши на смерть? Не ходи!». Яневи же повелѣвшу бити я, къ прочимъ поиде. Они же сунушася на Яня, и единъ грѣшися Яня топоромъ, а Янь же, обративъ топорокъ, удари тылиемъ и повелѣ отрокомъ сѣщи я, они же бѣжаша в лѣсъ. И убиша ту попина Янева. Янъ же, въшедъ въ градъ, бѣлозерцемъ рече: «Аще не имѣте волхву сию, не иду от васъ за лѣто». Бѣлозерци же шедъше, яша и приведоша къ нему. И рече има: «Что ради толико изъгубисте человекъ?». Они же рекоша, яко «ти дръжать обилие. Да аще истребиве и изъбееве сихъ, да будеть гобино. Аще ли хощете, то предъ тобою вымевѣ жито ли, рыбу ли, или иное что». Янъ же рече: «Поистиннѣ лжа то. Створилъ бо есть Богъ человека от земля, составленъ костьми и жилами, и от крове, и нѣсть в немъ ничто же; а вы не вѣсте ничто же, токмо Богъ единъ свѣсть». Они же рекоста: «Вѣдаемъ, како есть человекъ створенъ». Он же рече: «Како?» Они же рекоша: «Богъ мывся и отрясе вегтемъ, и сверже и с небеси на землю. И распрѣся сотона съ Богомъ, кому въ немъ створити человека. И створи дьяволъ человека, а Богъ во нь душу вложи. Тѣм же, аще умреть человекъ, въ землю идеть тѣло, а душа къ Богу». Рече има Янь: «Поистиннѣ, прельстилъ вы есть бѣсъ. Коему Богу, вѣруета?». И ани же рекоста: «Антихъстуз. Он же има рекъи: «То гдѣ есть?». Они же рекоста: «Сидить въ безднѣ». «То кии Богъ сидить въ безднѣ? То есть бѣсъ, а Богъ есть сидяи на престолѣ на небеси, славимыи от аггелъ, иже стоятъ ему со страхом, не могуще на нь зрѣти. Сих бо аггелъ сверженъ бысть, его вык глаголита Антихъста за величание его сверженъ бысть съ небеси и есть в безднѣ, яко же вы глаголита, жда, егда приидеть Богъ с небеси. Сего имъ Антихъста свяжеть юзами и посадить во огнѣ вѣчном съ слугами его, иже к нему вѣруютъ. Вамъ же и здѣ мука прияти от мене, и по смерти тамо». Онѣма же рекшима: «Нама бози повѣдаютъ: не можеши нама створити ничто же». Он же рече имъ: «Лжуть вамъ бози». Она же рекоста: «Намъ пред Святославомъ стати, а ты намъ не можеши створити ничто же». Янъ же повелѣ бити я и поторгати брадѣ ею. Сима же бьенома и брадѣ поторганѣ проскѣпомъ, рече имъ Янь: «Что вамъ бози молвят?». Онѣма же рекшима: «Стати нама предъ Святославомъ». И повелѣ Янь вложити имъ въ уста рубль и привязати я ко упругомъ, и пусти предъ собою в лодии, и самъ по нихъ поиде. И сташа на усть Шекъшны, и рече има Янь: «Что вамъ бози молвят?». Она же рекоста: «Сице намъ молвять: не быти нама живыма от тебе». Рече има Янь: «То то право повѣдують». Она же рекоста: «Аще наю пустиши, много ти добра будеть. Аще наю погубиши, то многу печаль и зло приимеши». Он же рече: «То аще ваю пущу, то зло ми будеть от Бога, аще ли ваю погублю, то мзда ми от Бога будеть». И рече Янь к извоздникомъ: «Ци кому вамъ кто родинъ будет убиенъ от сею?». Они же рѣша: «Мнѣ мати, а другому сестра». Он же речел : «Мьстите своихъ». Они же, поемше, и убиша ихъ, и повѣсиша на дубѣ, отместие приимше от Бога по правдѣ, а Яневи идущу домовъ, и въ другую нощь медвѣдь, узревъ, угрызъ, снѣсть и. И тако погибнуста бѣсовьскымъ наущениемъ, инѣмъ видяща и гадающа, и своея пагубы не вѣдуще. Аще быста вѣдала, не быста пришли на мѣсто се, идеже ятома има быти. Аще ли ята быста, то почто глаголата: «Не умрети нама», оному мысляще убити я. Но се есть бѣсовьское наущение. Бѣси бо не вѣдять мысли человеческыя, но влагаютъ помыслъ въ человека, таины не свѣдуще. Богъ же единъ вѣсть помышления человѣческая, бѣси бо не вѣдаютъ ничто же, суть бо немощни и худии взоромъ. Яко и се скажемъ о взорѣ ихъ и о омраченѣи ихъ.

Бывши единою скудости въ Ростовстѣи области, и въстаста два вльхва отъ Ярославля, глаголюще: «яко мы вѣдаемъ, кто обилие дрьжить;» и поидоста по Вльзѣ, где приидоста въ погость, ту же нарицааху лучшаа жены, глаголюще, яко сии жито дрьжатъ, а сии медъ, а сии рыбы, а сии скору. И привожааху къ нима сестры своа, и жены своа и матери; они же въ мечтѣ прорѣзываша за плечима, вынимаста изъ за кожиа любо жито, любо рыбы, или виверицу, и убивахуть жены тѣ многы, а имѣниа ихъ възымахуть себѣ. И приидоста на Бѣлоозеро; и бѣ у нихъ людии 300. Въ си же времена ключися приити отъ Святослава Ярославича дань емлющу Яневи, Вышатину сыну; и повѣдаша ему Бѣлозерци, яко два кудесника избили уже множество жень по Волзѣ и по Шекснѣ, и пришла еста сѣмо. Янь же испытавъ, чыа еста смерда, и увѣда, яко еста его князя, пославь къ нимъ иже около ею суть, и рече имъ: «выдаите вльхва та сѣмо, яко смерда моего князя и моа»; они же сего не послушаша. Янь же поиде самъ безъ оружиа, и рѣша ему отроци его: «не ходи безъ оружиа, изсоромотятъ тя;» онъ же повелѣ отрокомъ своимъ взяти оружие, и бѣ 12 отрокь его съ нимъ, и поиде къ нимъ къ лѣсу. Они же сташа, исполчишася противу, а Яневи же идущу съ топоркомъ, и выступиша отъ нихъ три мужи, глаголющи Яневи: «видя идеши на смерть; не ходи». Яневи же повелѣвшу бити а, кь прочиимъ же поиде. Они же сунушася на Яна, и единъ грѣшися Яна топоромъ, а Янь же обративь топорокь удари тылиемь, и повелѣ отрокомъ сѣщи я, они же бѣжаша въ лѣсъ; и убиша ту попина Янева. Янъ же вшедъ въ градъ, рече Бѣлозерцемь: «аще не имете влъхву сию, не иду отъ васъ за лѣто.» Бѣлозерци же шедше яша ихъ, и приведоша ихъ къ нему, и рече има Янь: «что ради толико изгубисте человѣкь?» Они же рекоша: «яко тии дрьжатъ обилие, да истребивѣ, избиевѣ сихъ, и будеть гобино; аще ли хощеши, то передъ тобою выимемъ жито, или рибу, или иное что?» Янъ же рече: «по истиннѣ лжета; сътворилъ бо есть Богъ человѣка отъ земля, составлень костми и жилами и отъ крове, и нѣсть въ немъ ничтоже; а вы не вѣсте ничтоже, токмо Богъ единь съвѣсть.» Они же рекоста: «вѣдаемъ, како есть человѣкь сътворень.» Онъ же рече: «како?» Они же рѣша : «Богъ мывся и отреся вѣхтемь, и свръже съ небесе на землю; и распрѣлся сотона сь Богомъ, кому въ немъ сътворити человѣка? и сътвори диаволъ человѣка, а Богъ въ немъ душу воложи; тѣмже аще умретъ человѣкь, въ землю идетъ тѣло, а душа кь Богу.» Рече има Янь: «по истиннѣ прельстилъ вы бѣсь; коему же вы богу вѣруете?» Они же рѣша: «антихристу.» Онъ же има рекь: «то гдѣ есть?» Она же рекоста: «сѣдить въ безднѣ.» Онъ же рече: «то есть бѣсь, а Богь есть сѣдяи на престолѣ на небеси, славимыи отъ аггель, иже предстоятъ ему сь страхомъ, не могуще на нь зрѣти; тои же зверженъ бысть, егоже вы глаголете антихриста, за величание его съврьжень бысть сь небеси, и есть въ безднѣ, якоже вы глаголета; и егда приидетъ Богъ съ небесе, сего вамъ антихриста свяжетъ узами нерѣшимыми, и посадить въ огни вѣчномь и сь слугами его и иже къ нему вѣрують; вамъ же и здѣ мука приимати отъ мене, и по смерти тамо.» Онѣма же рекшима: «нами бози повѣдають, не можеши нами сътворити ничьсоже.» Онъ же рече имъ: «лжутъ вами бози.» Она же рекоста: «намъ предъ Святославомъ стати, а ты намъ не можеши сътворити ничтоже.» Янъ же повелѣ бити ихъ и поторгати брадѣ ею. Сима же биенома, и брадѣ поторганѣ проскѣпомъ, и рече имъ Янъ: «что вамъ бози молвятъ?» Онѣма же рекшима: «стати намъ предъ Святославомъ.» И повелѣ Янъ вложити имъ въ уста рубль, и привязати ихъ кь упрогомъ, и пусти предъ собою въ лодьи, и самъ по нихь поиде. И сташа на усть Шексны; и рече има Янъ: «что вамъ бози молвять?» Она же рекоста: «сице намъ молвятъ, не быти нами живыма отъ тебе.» И рече имъ Янь: «то то правду повѣдаютъ.» Она же рекоста: «аще наю пустиши, то много ти добра будеть; аще наю погубиши, то многу печаль и зло приимеши.» Онъ же рече: «то аще ваю пущу, то зло ми будеть отъ Бога; аще ли ваю погубить, мзда ми будетъ отъ Бога.» И рече Янь къ извозникомъ: «еликому отъ васъ племя побиено отъ сею?» Они же рѣша: мнѣ мати, а другому сестра. Онъ же рече: «мьстите родинь своихъ.» Они же поемше и убиша ихъ, и повѣсиша ихь на дубѣ, отместие приемше отъ Бога по правдѣ; а Яневи идущу домовь, и въ другою нощь медвѣдь узрѣвь, угрызъ ею, снѣсть ихъ; и тако погыбнуста бѣсовскымъ наущениемъ, инѣмъ видяща и гадающа, а своеа пагубы не вѣдуще. Аще быста вѣдала, то не быста пришли на мѣсто се, идѣже ятома има быти; аще ли ята быста, то почто глаголаста: «не умрѣти нама,» оному мыслящу убити а? Но се есть бѣсовское наущение; бѣси бо не вѣдаютъ мысли человѣческыа, но влагаютъ помысль вь человѣка, таины не свѣдуще. Богъ же единь вѣсть помышления человѣческаа, бѣси бо не свѣдають ничтоже: суть бо немощни и худи възоромъ. Яко и се скажемъ о взорѣ ихъ и о мрачении ихь.

В лѣто 6580 [1072]. Пренесоша святая страстотерпца Бориса и Глѣба. Совокупившеся Ярославци: Изяславъ, Святославъ, Всеволод, митрополитъ же бѣ в то время Георгии, и епископи: Петръ переяславьскыи, Михаилъ юрьевьскыи, Федосии игуменъ Печерьскыи, Софронии святого Михаила игуменъ, Германъ игуменъ, и прочии вси игумени, и створивше праздникъ свѣтелъ, положиша я в новую церковъ, юже созда Изяславъ, яже стоить и нынѣ. Въземши бо первое Бориса въ древянѣ рацѣ Изяславъ, Святославъ, Всеволод, вземши на рама своя и понесоша, предидущими чернци и свѣща держаща в руках, и по них диаконы с кандѣлы, посемъ прозвутеры, и по нихъ епископи с митрополитомъ, и по нихъ с ракою идоша. И принесъши в новую церковъ, отверзоша раку; исполнися церкви благоуханиа и вони благы. Видѣша же се и прославиша бога. И митрополита ужасть обдержаше: бѣ бо нетвердо вѣру держаше к нима; и пад ниць, просяше прощениа. И цѣловавше мощи его, вложиша в раку камену. Посем же, вземше Глѣба в рацѣ камени, въставиша на сани; имше за ужа, везоша и. И яко быша въ дверех, и абие ста рака, не идущи; и повелѣша народомъ звати: «Господи, помилуи», и повезоша и; и положиша я мѣсяца маия въ 2. И отпѣвше литургию, обѣдаша братья вси на купъ, коиждо съ бояры своими, и с любовию великою. Бѣ тогда Вышегород держа Чюдинъ, а церковь Лазарь. Посемь разидошася въ своя сы.

И совокупившеся братия Ярославичи, Изяславъ, Святославъ, Всеволодъ, и митрополитъ Георгии киевьскыи и другыи, Неофитъ, черниговьскыи епископъ, Петръ Переяславьскыи, Никита Бѣлогородьскыи, Михаило Юрьевьскыи и игуменъ Феодосии Печерьскыи, Софронии Святого Михаила, Германъ Святого Спаса, Никола Переяславьскыи и прочии игумени, и попы, и диякони, пришедше съ кресты и с кандилы, и съ свѣщами многыми, идеже лежить святую телесе пречистѣи, и створивъ молитву, и повелѣ и откопати перьсть, сущую на гробѣ святую. Копающим же имъ, исхожааше благоуханная воня от гроба святую. И откопавше, изнесоша от земля. И приступивъ митрополитъ Иоанн с прозвитеры, съ страхомъ и любовию откры гробъ святую, и видѣша чюдо преславно: телеса святыхъ никакоя же язвы не имуща, но все цѣло, и лица ихъ свѣтла бѣста, яко аггела; яко дивитися епископу зѣло, и всимъ исполнившимся благоухания многа, и створиша празднество свѣтло. И вземше святого Бориса въ древенѣ рацѣ на рама своя, понесоша князи. И предъ идущимъ преподобнымъ чернецемъ со свѣщами, и по нихъ диякони с кадилы, таче и прозвитеры, и по сихъ митрополитъ и епископи, и по сих носяаху раку. И принесше, и поставиша и в новои церкви, юже здѣла Изяславъ, яже стоить и нынѣ. И отверзоша раку, и исполнися церкви благоухания и воня пречюдныи. И си видѣвши, и прославиша Бога. Митрополита же обыде ужасъ, бяше бо не твердо вѣруя в святыма, и падъ ниць, просяще прощения, и целовавше мощи его, вложиша и в раку каменну. И по семъ вземше Глѣба в рацѣ каменнѣ, въставивше на сани и емше ужи, повезоша и, и яко быша въ дверехъ, и ста рака, не поступяще от мѣста. И повелѣша народомъ звати: «Господи, помилуи». И моляахуся господеви и святыма мученикома. И абие подвижеся рака, и повезоша и, и положиша и месяця маия въ 2 день. И целовавше главу святого Бориса, и святого Глѣба руку вземъ Георгии митрополитъ и благословяшеть князя Изяслава и Святослава, и Всеволода. И пакы Святославъ, имъ за руку митрополита, держаща святого руку, прилагааше къ вреду, им же боляаше на шии и по семъ къ очима и къ тѣмени. И пакы положи руку въ гробѣ, и начаша пѣти святую литургию. И рече Святославъ къ Бернови: «Нѣчто мя на главѣ бодет». И сня клобукъ. И видѣ Беренъ ноготь святого Глѣба, и снятъ и съ главы, и вдасть Святославу, он же прослави Бога о благодарении святыхъ мученикъ Бориса и Глѣба. И по литургии вся братья идоша кождо с боляры своими и обѣдаша вкупѣ с любовию великою. И празнествоваше празднество свѣтло, и много милостыни створиша убогымъ. И целовавшеся, мирно разидошася кождо въсвояси. И оттоле утвердися таковыи празникъ месяца маия 21 день въ славу святыхъ мученикъ Бориса и Глѣба благодатью господа нашего Исуса Христа. Аминь.

О перенесении мощемъ святою мученику Бориса и Глъба. Того же лѣта бысть пренесению время святыма мученикома Романа и Давыда; съвокупившеся трие братиа Ярославичи, князь великии Изяславъ, и Святославъ и Всеволодъ , и митрополитъ Георгии Киевскии, и Неофитъ, епископь Черниговьскыи, Петрь, епископь Переяславскии, Никита, епископь Бѣлогородскыи, Михаило, епископь Юриевскыи, игумень Феодосии Печерьскыи, Софронии, игумень отъ святаго Михаила, Германь, игумень отъ святаго Спаса, и Николае Переяславьскыи, и прочии вси игумени, и попове и диакони, и пришедше съ кресты, и съ кандыли и съ свѣщами многыми, идеже лежатъ телесе святою пречестнеи, и сьтворивше молитву повелѣша окопати прьсть, сущую на гробѣ святою. Копающемъ же имъ, исхождааше благоуханная воня отъ гроба святою; и окопавше изнесоша отъ земля; и приступивъ митрополитъ сь епископы и прозвытеры, съ страхомъ и любовию откры гробь святую, и видѣша чюдо преславно: телеса святыхъ никакояже язвы не имуща, но все цѣло, и лица ихъ свѣтло бѣста яко аггела, яко дивитися архиепископу зѣло, и всимъ исполнившимся благоуханиа многа. И сьтвориша празденьство свѣтло, и вземше святаго Бориса въ рацѣ древянѣ князь великии Изяславь и братиа его, Святославь Черниговьскии и Всеволодъ Переяславьскыи, понесоша сами на рамѣхь своихъ, предъидущимъ чрьнцемъ, свѣща дрьжащемъ въ рукахъ, и по нихь диакони съ кандилы, таче и прозвытеры, и по сихъ митрополитъ и епископи, и по сихъ ношааху раку; и принесше и поставиша въ новои церкви, юже сьдѣла князь великии Изяславь, яже стоитъ нынѣ. И отврьзоша раку, и исполнися церкви благоуханиа и воня пречюдны; и вси видѣвше, и прославиша Бога. Митрополита же обыде ужасъ, бѣ бо нетврьду имѣа вѣру кь святыма, и падъ ниць просяше прощения; и цѣловавши мощи его, и вложиша въ раку каменну. Посемь же вземше святаго Глѣба въ рацѣ каменнѣ, въставивше на сани, и емши за ужа , повезоша ѝ; и яко быша въ дверехъ, и ста рака, не поступааше съ мѣста. И повелѣша народомъ звати: «Господи помилуи»; и моляхуся Господеви и святыма мученикома, и абие подвижеся рака, и повезоша его, и положиша его мѣсяца маиа въ 2 день. И цѣловавше святаго Бориса главу, а свягаго Глѣба рука въземъ митрополитъ, и благословяше великого князя Изяслава и братию его, Святослава и Всеволода; и пакы Святославь емъ за руку митрополита, дръжаща святаго Глѣба руку, и прилагааше кь вреду, имьже боляше на шии, и посемь кь очима и къ тѣмяни, и пакы положи руку въ гробѣ; и начаша пѣти святую литоргию. И рече Святославъ кь Бернови: «нѣчто мя на главѣ бодетъ »; и сня клобукъ,и видѣ Бернъ ноготь святаго Глѣба, и снятъ его съ главы и вдасть Святославу; онъ же прослави Бога о благодарении святыхъ мученикь Бориса и Глѣба. И по литургии вся братиа идоша кождо сь боляры своими, и обѣдаша вкупѣ сь любовию великою, бѣ бо тогда дръжа Вышегородъ Чюдинь, а церковь Лазоръ, и празноваша празденьство свѣтло, и много милостини сътвориша убогымъ; и цѣловавшеся, мирно разыдошася кождо вь своаси. И оттолѣ утвръдися таковыи праздникь мѣсяца маиа въ 2 день, въ славу святыхь мученикь Бориса и Глѣба. Бѣ же отъ убиениа ею святаго Бориса до пренесениа лѣть 57, а святаго Глѣба отъ погребениа до пренесениа лѣть 53, а не погребень былъ 4 лѣта, понеже Ярославь бѣ воюяся сь Святополкомь, того ради не взыде ему помышление о телесехъ святою, токмо о воиньственыхъ прележааше. Тако бо многажды случается человѣкомъ: о каковѣ либо вещи сътворити отъ всея душа потщание, то и самую пищу оставляють, дондеже мысль свою скончають.

В лѣто 6581 [1073]. Въздвиже диаволъ котору въ братьи; а сии Ярославици бывши междю собою в распрѣ велици: Святославъ со Всеволодомъ на Изяслава. Изиде ис Кыева Изяславъ; Святославъ и Всеволод внидоста в Кыевъ мѣсяца марта въ 22, и сѣдоста на Берестовѣмъ на столѣ, преступивше заповѣдь отню. Святославъ же бѣ начало выгнанию братню, желая болшая власти; Всеволода бо прельсти, глаголя, яко «Изяславъ сватится со Всеславомъ, мысля на наю; да аще его не варивѣ, имать наю прогнати»; и та възостри Всеволода на Изяслава. Изяславъ же иде в Ляхы съ имѣниемъ многымъ и съ женою, уповая богатствомъ многымъ, глаголя, яко «Симъ налѣзу воя», еже все взяша ляхове у него, показавше ему путь от себе. А Святославъ сѣде в Киевѣ, прогнавъ брата своего, преступивъ заповѣдь отню, паче же божию. Великъ бо есть грѣх преступающе заповѣдь отца своего; ибо исперва приступиша сынове Хамовѣ на землю Сифову, по лѣтех 400 отмщение прияша от Бога; от племени бо Сифова суть Еврѣи, иже избивше Хананѣиско племя, и въсприяста свои жеребѣи, свою землю. И пакы преступи Исавъ заповѣдь отца своего, и прия убииство: не добро бо есть преступати предѣла чюжаго.

В се же лѣто основана бысть церкви Печерьскаяго манастыря игуменомъ Федосиемъ и епископомъ Михаиломъ; а митрополиту Георгию сущю тогда въ Гречьскои земли, а Святославу в Кыевѣ сѣдящю.

В лѣто 6581 [1073]. Въздвиже диавол котору в братьи сеи Ярославичех. Бывши распри межи ими, быста собѣ Святослав съ Всеволодом на Изяслава. И изыде Изяслав ис Киева, Святославъ же и Всеволод внидоста в Киев, марта 22, и сѣдоста на столѣ на Берестовѣм, преступивше заповѣдь отца своего, Святославъ же бѣ начало изгонению братню и желаа большая власти; Всеволода бо прелсти, глаголя, яко Изяслав сватится съ Всеславом, мысля на наю; да аще его не остережевѣся, имать ны прогнати. И тако взостри Всеволода на Изяслава. Изяславъ же иде в Ляхы съ имѣнием многым и с женою, уповаа на множество богатства, глаголя: Сим налѣзу плъкъ собѣ в помощь. И взяша все ляхове у него, и показавше ему путь от себе. А Святославь сѣде в Киевѣ, прогнав брата своего, преступив заповѣдь отца своего, паче же Божию. Велии бо есть грѣх преступающим заповѣдь отню; ибо исперва преступишя сынове Хамови на землю Сифову и по 400 лѣтех отмщение приашя от Бога; от племене бо Сифова суть евреи, иже избивше Хананѣиско племя, въсприашя свои жребии и свою землю; и пакы преступи Исав заповѣдь отца своего, и прия убииство; не добро есть преступати предѣла чюжаго. В се же лѣто основана бысть церковь Печерская игуменом Феодосиемь и епископом Михаилом, митрополиту Георгию тогда сущу в Грецѣх, а Святославу в Киевѣ.

В се же лѣто основана бысть церковь Печерская игуменом Феодосиемь и епископом Михаилом, митрополиту Георгию тогда сущу в Грецѣх, а Святославу в Киевѣ.

В лѣто 6581 [1073]. Въздвиже дияволъ котору въ братии сии, Ярославичехъ. Бывши распря межи ими, бывъ себе Святославъ со Всеволодомъ на Изяслава. Изыде Изяславъ ис Киева, Святославъ, Всеволодъ внидоста в Киевъ месяца марта въ 22 и сѣдоста на Берестовомъ на столѣ, преступивше заповѣдь отню. Святославъ же бѣ начало въгнанию братню, желая болшая власти, Всеволода прельсти, глаголя, яко «Изяславъ свадится съ Всеславомъ, мысля на ня. Да аще его не попредимъ, имать наю прогнати». И тако възостри Всеволода на Изяслава. Изяславъ же иде в Ляхи съ имениемъ многымъ и съ женою, уповая богатеством многымъ, глаголя, яко «симъ налѣзу воя». Еже все взяша ляхове у него, показавше ему путь от себе.

А Святославъ сѣде в Киевѣ, прогнавъ брата своего, преступивъ заповѣдь отню, паче же божию, великъ бо есть грѣх преступающимъ заповѣдь отца своего. Ибо исперва преступиша сынове Хамови на землю Сифову, по 400 лѣтъ отмщение прияша от Бога. От племени бо Сифова суть евреи, иже избиша хананѣиско племя и въсприяша свои жребии, свою землю. И пакы преступивъ заповѣдь Исавъ отца своего, и прия убииство. Не добро есть преступати въ предѣлы чюжаго.

О изгнании Изяславли. Въ лѣто 6581 [1073]. Въздвиже врагь диаволь вражду вь Ярославичехь. Бывши распри межи ими, быста заединъ Святославь съ Всеволодомъ на великого князя Изяслава; князь же великыи Изяславь изыиде ис Киева и бѣжа въ ляхы, Святославъ же и Всеволодъ вниидоста вь Киевь, мѣсяца марта вь 22 день, и сѣдоста на столѣ на Берестовомъ, преступивше заповѣдь отца своего. Святославъ же бѣ начало выгнанию братию, желаа болшаа власти; Всеволода бо прельсти, глаголя: «яко Изяславь единяется съ Всеславомъ, мысля на наю; да аще его не попредимъ, имать на прогнати»; и тако възостри Всеволода на Изяслава. Изяславъ же иде въ ляхы съ имѣниемь многымъ и съ княгынею, уповаа богатствомъ многымъ, глаголя: «яко симъ налѣзу воа»; еже вся взяша у него ляхове, показаша ему путь отъ себе.

А Святославь сѣде вь Киевѣ, прогнавь брата своего, преступивь заповѣдь отца своего , великаго князя Ярослава Володимеровича, паче же Божию. Великь бо есть грѣхь преступати заповѣдь отца своего: ибо испрьва преступиша сынове Хамови на землю Симову, по 400 лѣтѣхъ приаша отмщение отъ Бога, отъ племене бо Симова суть Евреи, иже избыша Хананѣиско племя, и въсприаша свои жребии, свою землю. И пакы преступивъ Исавь заповѣдь отца своего, и приа убииство; не добро есть преступати въ предѣлы чюждаго.

О основании церкви печерскыа каменныа Феодосиева манастыря, при великомъ князь Святославѣ Ярославичѣ на другом холме, Т... и манастырь при..., идеже и донынѣ ст...Того же лѣта основана бысть церкви Печерьскаго манастыря игуменомъ Феодосиемъ и епископомъ, митрополиту Георгию тогда сущу вь Грецѣхь, Святославу вь Киевѣ сѣдящу на великомъ княжении.

В лѣто 6582 [1074]. Преставися Федосии, игуменъ Печерьскаго монастыря. Скажем же и успение его мало. Федосии бо имѣяше обычаи: внегда же приходящу постному времени, в недѣлю масленую, в вечеръ, по обычаю цѣловавъ братью и поучивъ их, како проводити имъ постъное время въ молитвахъ в нощьных, такоже и въ дневных, и блюстися от помыслъ лукавых и от бѣсовьскаго насияниа; «Бѣси бо всивають помышления чернцемъ, похотѣниа лукава, влагающе ему помыслы, и тѣмъ врежаеми бывают имъ молитвы. Да приходящая таковыи мысли возбраняют знамениемь крестнымъ, глаголюще: господи Иисусе христе, сыне божии, помилуи нас, аминь. И къ симъ въздержание имѣти от многаго брашна; въ ядении мнози и в питьи безмѣрнемъ и възрастают помыслы лукавии, помыслом же възрастъшим, стваряет грѣх. Тѣм же, рече, противитѣся бѣсовьскому дѣиству и пронырьства их, и блюстися от лѣности и от многа сна, и бодру быти на пѣние церковное и на преданиа отечьская и почитаниа книжная; паче же въ устѣх имѣти псалтирь Давыдовъ подобаеть же черноризъцемъ, симъ прогонити бѣсовьское уныние; паче же всего имѣите любовъ в себѣ; меншим къ старѣишимъ покорение и послушание, и старѣишимъ к меншимъ любовь и наказание, и образъ показати собою въздержаниемъ и бдѣниемъ и хожениемъ и смирениемъ; и тако наказывати меншая, и наказати, и утѣшати я, и тако проводити пост». Глаголаше бо сице, яко «богъ далъ есть намъ 40 днии сию на очищение души и тѣлу: се бо есть десятина даема от лѣта богу; днии бо есть от года до года 365, и от сих днии десятыи день въздаяти богу десятину, еже есть постъ съ четыредесятныи, в няже дни очистивъшися душа празднуеть свѣтло на въскресение господне, веселящися о господѣ. Постъное бо время очищаеть умъ человѣку: пощение бо исперва проображено бысть Адаму пръвѣе, не вкушати от дрѣва единаго; постивъ бо ся Моисии дни 40, и сподобися прияти законъ на горѣ Синаистѣи, и видѣвъ славу божию; постомъ Самоила мати роди; постивше бо ся Ниневгитяне, гнѣва божиа избыша; постивъся Данило, видѣниа сподобися великаго; постився Илья, яко на небо взятъ бысть, въ пищу породную; постившеся трие отроци, угасиша силу огненую; постися господь днии 40, намъ показая постное время; постомъ апостоли искорениша бѣсовьское учение; постомъ явишася отци наши акы свѣтила в мирѣ, иже сияють по смерти, показавше труды великыя и воздержаниа, яко се великыи Антонии, Еуфимии и Сава и прочии отцы, имъ же и мы поревнуимъ, братие». И сице поучивъ братью и цѣлова вся по имени, глаголя имъ; и тако исхожаше изъ манастыря, взимая мало хлѣба, единь укрух; и пакы вшедши в пещеру, затворяше двери печерѣ и засыпаше перьстью, не глаголаше никомуже; аще ли кому бываше нужное орудье, то оконцемъ малымъ бесѣдоваше к нимъ в суботу или в недѣлю; а по иныи дни пребываше в постѣ и въ молитвах, въздержася крѣпко. Приходяше в монастырь в пятокъ, на канунъ Лазаревь; в сии бо день концѣвается постъ 40, начинаемъ от пръваго понедѣлника, наставшю Федоровѣ недѣли, концается в пяток Лазаревъ; а страстьная недѣля уставлено есть поститися страсти ради господни. Феодосиевѣ же пришедшю по обычаю, цѣловавъ братью, и празднова с ними в недѣлю цвѣтную. И дошедъ великаго дне въскресения, по обычаю празднова свѣтло, и впаде в болѣзнь. Разболѣвъшю бо ся ему днии пять, посемъ, бывшю вечеру, повелѣ изнести ся на дворъ; братья же, вземши носило и изнесъши, поставиша прямо церкви. Онъ же повелѣ съзвати братью всю; брат же, на то устроенъ бѣ, удари в било, и абие събрашася братиа вси. Он же глагола имъ: «Братьа мои и отци мои и чада моя, се, азъ уже отхожю от вас, якоже яви ми господь в постъное время, сущу ми в пещерѣ, изити от свѣта сего; вы же кого хощете игуменомъ имѣти себѣ, да и азъ, убогыи, благословение подалъ бых ему». Они же глаголаша ему: «ты еси отець намъ всѣм, да аще коего самъ изволиши, то намъ будет отець и игуменъ; послушаемъ его, якоже и тебе». Отець же нашь Федосии глаголаше: «шедши кромѣ мене, рците кого хощете от старѣиших до менших». Они же послушаша его, отступиша мало къ церкви, сдумавше послаша два брата, глаголюще сице: «егоже изволи богъ и твоя честная молитва; кого тобѣ любо, того намъ рци». Федосии же рече имъ: «аще хощете от мене прияти игумена, то и азъ створю им не по моему изволению, нь по божию строению»; нарече имь Якова прозвитера. Братьи же нелюбо бысть се, нь сице глаголюще, яко «не здѣ у нас постриженъ есть»: бѣ бо Яковъ пришелъ издалеча съ братом своимъ с Павлом; и начаша братьа просити Стефана, демественика суща тогда, ученика Федосьева, мужа по всему обычаемъ блага и кротка, тиха и смирена, иже глаголюща, яко «сеи възраслъ есть под рукою твоею и у тебе служилъ есть; сего нынѣ вдаи». И рече имъ Федосии: «се, азъ по божию повелѣнию нареклъ бѣх Якова, се же вы свою волю створити хощете»; и послуша ихъ, предаст имъ Стефана, да будет имъ игуменъ. И благослови Стефана, и рече ему: «чадо, се, предаю ти манастырь, блюди съ спасениемъ его, и яже устроихъ въ службах, то держи; преданиа манастырьская, устава не измѣняи, нь твори вся по закону, по чину манастырьску». И посемъ вземше братья, и несоша его в келию, и положиша на одрѣ. И шестому дни наставшю, болну сущу вѣдому, прииде к нему Святославъ съ сыномъ своимъ Глѣбомъ. Сѣдящим же имъ у него, рече ему Федосии: «се, отхожю свѣта сего; се, предаю ти манастырь на соблюдение, еда будеть что смятение в немъ; и се, поручаю игуменьство Стефану, и не даи его въ обиду». И абие князь Святославъ и съ сыномъ своимъ Глѣбомъ цѣловавъ святого старца и обѣшавъся манастыремъ пещися.

В лѣто 6582 [1074]. Феодосии, игуменъ Печерьскыи, преставися. Скажем же и успение его мало. Феодосии бо обычаи имяше: приходящу постному времени, в недѣлю масленую въ вечеръ по обычаю целовавъ братию и поучивъ ихъ, како проводити постное время въ молитвахъ нощныхъ и дневныхъ и блюстися от помыслъ лукавыхъ и от бѣсовьскаго насѣяния: «Бѣси бо всѣваютъ помышления чернецемъ, похотѣния лукава, влагающе ему помыслы, и тѣмъ врежаеми бываютъ. Възбраняите знамениемъ креста честнаго, глаголюще сице: "Господи Исусе Христе, сыне божии, помилуи нас. Аминь". И к симъ въздержание имѣти от многа бо брашна, въ ядении мнозѣ и въ питьи безмѣрнѣмъ възрастають помысли лукавии. Помысломъ же възрастъшимъ, створяетъ грѣх. Тѣм же, — рече, — противитися бѣсовьскому дѣиству и пронырьства ихъ и блюстися от лѣности, и бодру быти на пѣние церковное, и на предания отечьская, и почитания книжная, паче же въ устѣхъ имѣти псалтирь, подобаеть же черноризцемъ симъ прогонити бѣсовьское уныние. Паче же всего имѣти любовь в себѣ, меншимъ къ стареишимъ покорение и послушание, стареишимъ къ меншимъ любовь и наказание; и образъ бывати собою въздержаниемъ и хожениемъ, и смирениемъ; и тако наказати меншая, и наказати и утѣшати я, и тако проводити постъ». Глаголаше бо сице, яко «богъ намъ далъ есть 40 днии сию на оцищение души и тѣлу. Се бо есть десятина, даема от лѣта богу. Днии бо есть от года до года 365, и от сихъ дни десятыи день въздаяти богу десятину, еже есть постъ сии 40-ныи. В ся же дни очистившеся душа празнуеть свѣтло на въскресение господне, веселящеся о господѣ. Постное бо время оцищает умъ человеку. Пощение бо исперва въображено бысть Адаму первое, не вкушати от древа единого. Постившеся Моисѣи дни 40, сподобися прияти законъ на горѣ Синаистѣи и видѣвъ славу божию. Постомъ Самоила мати роди. Постившися, невгитяне гнѣва божия избыша. Постився, Данилъ видѣния сподобися великаго. Постився, Илья на небо взятъ бысть в пищу породную. Постився, трие отроци угасиша силу огняну. Постився господь дни 40, намъ показа постное время. Постомъ апостоли искорениша бѣсовьское учение. Постомъ явишася отци наши, акы свѣтило в мирѣ, иже сияютъ и по смерти, показавшие труды великия и въздержания, яко се великии Антоние и Еуфимии, и Сава, и прочии отци, им же и мы поревнуемъ, братья». И сице поучивъ братью, и целова вся по именемъ. И тако изыде из манастыря, взимая мало ковригъ. И вшедъ в пещеру, затворяаше двери пещеры и засыпааше перьстию, не глаголааше никому же. Аще ли нужное дѣло, то оконцемъ мало побесѣдовааше въ суботу или в недѣлю, а по ины дни пребывааше в постѣ и въ молитвахъ, въздержася крѣпко. Прихожааше въ монастырь в пятокъ на канунъ Лазаревъ. В сии бо день канчивается постъ 40, начинаемъ от перваго понедѣлника, наставши Феодоровѣ недѣли, кончается в пятокъ Лазаревъ, а страстная недѣля уставлена есть поститися страсти ради господни. Феодосию же пришедшу по обычаю, целовавъ братию и празнова с ними в недѣлю цвѣтную. И дошедъ великаго дне Въскресения, по обычаю празнова свѣтло и впаде въ болѣзнь. Разболѣвшю же ся ему днии пять, по семъ бывшу вечеру, повелѣ изнести ся на дворъ. Братия же, вземше на санехъ, поставиша прямо церкви. Он же повелѣ созвати братию всю. Брать же удари в било, и собрашася вси. Он же рече: «Братия моя и отци мои, и чада моя! Се яз отхожу уже от васъ, яко же яви ми господь в постное время, в пещерѣ сущи ми, изыти от свѣта сего. Вы же кого хощете игуменом имѣти у себе? Да и азъ бых благословение подалъ ему». Они же рекоша ему: «Ты еси отець намъ всѣмъ, да его же самъ изволиши, да тои намъ будет отець и игуменъ, послушаемъ его, яко и тебе». Отець же нашь Феодосии рече: «Шедше кромѣ мене, рците, кого хощете от стареишихъ и до меншихъ». Они же послушаша его, отступиша мало въ церкви, здумаша, послаша два брата, глаголюще сице: «Его же изволи богъ и твоя честная молитва, его же тебѣ любо, того намъ рци». Феодосии же рече: «Да аще хощете от мене прияти игумена, то и азъ створю имъ не по моему изволению, но по божию изволению». Нарече имъ Иякова презвитера. Братии же не любъ бысть, глаголюще: «Не здѣ постриганъ есть». Бѣ бо Ияковъ издалеча пришелъ з братомъ с Павломъ. И начаша братия просити Стефана, да будеть имъ игуменъ, суща тогда ученика Феодосиева, глаголюще, яко «сеи възраслъ есть подъ рукою твоею и у тебе послужилъ есть. Сего ны вдаи». И рече имъ Феодосии: «Се язъ по божию повелѣнию нареклъ былъ Иакова. Се же вы свою волю створити хощете». И послуша ихъ, предасть имъ Стефана, да будет имъ игуменъ, и благослови Стефана, нарече ему: «Чадо! Се предаю ти манастырь. Блюди съ спасениемъ его, и яже устроихъ въ службахъ, то дръжи предания монастырьская. Устава не измѣняи, но твори вся по закону, по чину манастырьску». И по семъ вземше и братия и несоша и в кѣлию, положиша и на одрѣ. И шестому дни наставшу, болну сущу вѣдому, прииде к нему Святославъ съ сыномъ своимъ Глѣбомъ. Сѣдящимъ имъ у него, рече ему Феодосии: «Се отхожу свѣта сего. Се предаю ти манастырь на соблюдение, еда будеть что смятение в немъ. И се поручаю игуменьство Стефану, и не да и его въ обиду». Князь, целовав его, обѣщася манастыремъ пещися.

О ПРЕСТАВЛЕНИИ ИГУМЕНА ФЕОДОСИЯ ПЕЧЕРЪСКАГО. Въ лѣто 6582 [1074]. Феодосии, игумень Печерскыи, преставися. Скажемъ же и о успении его мало. Феодосии бо обычаи имѣаше, приходящу постному времени, въ недѣлю сыропустную, вечерь, по обычаю цѣловавь братию, поучити ихъ, како проводити постное время въ молитвахъ нощныхъ и дневныхъ, и блюстися отъ лукавыхъ помышлении, отъ бѣсовскаго насѣания. «Бѣси бо» рече «Въсѣвають помышлениа чрьнцемъ, похотѣниа лукава, вжагающе имъ помысли, и тѣмь врежаемы имь бываютъ молитвы; да приходящаа таковыа помысли възбраняите знамениимь креста, глаголюще сице: "Господи Исусе Христе, Сыне Божии, помилуи насъ, аминь. И къ симъ въздрьжание имѣти отъ многаго брашна; въ ядении мнозѣ и питии безмѣрнѣмь възрастають помысли лукавии, помысломъ же възрастьшимь сътворяетъся грѣхь. Тѣмже, рече, противитися бѣсовскому дѣиству и пронирству ихъ, и блюстися отъ лѣности и отъ многаго сна, и бодру быти на пѣние церковное, и на преданиа отческаа, и почитаниа книжнаа, паче же въ устѣхъ имѣти псалтырь Давыдовъ, подобаетъ же черноризцемь симъ прогонити бѣсовьское уныние, паче же всего имѣти любовь въ себѣ, меншимъ кь старѣишимъ покорение и послушание, старѣишимъ же къ меньшимъ любовь и наказание, и образъ бывати собою воздрьжаниемъ, и бдениемь, и хождениемь, и смирениемь; и тако наказати меншаа, и утѣшати ихь, и тако проводити постъ». Глаголаше бо сице: «Яко Богъ намъ даль есть четыридесять днии сиа на очищение души и тѣлу; се бо есть десятина даема отъ лѣта Богу: днии бо есть отъ года до года 365, и отъ сихъ днеи десятыи день въздаати Богу десятину, еже есть пость сыи 40-ныи, въ няже дни очистившися душа, празнуеть свѣтло на Воскресение Господне, веселящися о Господи. Постное бо время очищаетъ умъ человѣку. Пощение бо исперва вьображено бысть: Адаму прьвое не въкушати отъ древа единого; постивъ же ся Моисеи днии 40, сподобися приати законь на горѣ Синаистѣи и видѣвь славу Божию; постомъ Анна Самоила роди; постившеся Ниневгитяне Божиа избыша гнѣва; постився Данииль сподобися великого видѣниа; постився Илиа на колесници огненѣи взятъ бысть въ пищу породную; постившеся трие отроци угасиша силу огнену; постився Господь день 40, намъ показа постное время; постомъ апостоли искорениша учение бѣсовское; постомъ явишася отци наши акы свѣтила въ мирѣ, иже сиають и по смерти, показавше труды великыя и вьздрьжаниа, яко се великии Антонии, и Еуфимии, и Сава, и прочии отци, имже и мы потревнуемъ, братие». И сице поучивь братию, цѣлова всѣхъ по имени, и тако изыиде изъ манастыря, възимаа мало ковригь; и вшедь вь пещеру, затворяаше двери пещеры, изасыпаше перьстию, не глаголааше никомуже; аще ли будетъ нужное дѣло, то оконцемъ мало побесѣдоваше въ суботу или въ недѣлю, а во иын дни пребываше вь постѣ и вь молитвахь, вьздрьжася крѣпко; и прихождааше вь манастырь въ пятокъ 6 недѣли на канунь вьскресениа Лазарева, въ си бо день кончавается пость 40-ныи, начинаемъ отъ прьваго понедѣлника наставши Феодоровѣи недѣли, кончавается въ пятокь Лазаревь, а страстьнаа недѣля уставлена есть поститися страсти ради Господни. Феодосиеви же пришедшу, по обычаю цѣловавъ братию, и празднова съ ними недѣлю цвѣтную, и дошедъ великого дне Въскресениа, по обычаю празднова свѣтло, и впаде въ болѣзнь; разболѣвшю же ся ему и болѣвшу днии 5, посемь бывши вечеру, повелѣ изнести ся на дворъ; братиа же въземше, на санехъ поставиша прямо церкви. Онъ же повелѣ събрати братию всю; братъ же удари вь било , и събрашася вси; онъ же рече: «Братиа моа, и отци мои и чада моа! Се азъ отхожду уже отъ васъ, якоже яви ми Господь въ постное время, въ пещерѣ сущу ми, изыити отъ свѣта сего; вы же кого хощете имѣти собѣ, да и азъ быхъ благословение подалъ ему?» Они же рекоша ему: «Ты еси отецъ намъ всѣмь, да егоже самъ изволиши, да тои намь будетъ отецъ и учитель игумень, послушаемъ его яко и тебе». Отецъ же нашъ Феодосии рече: «Шедше кромѣ мене рците кого хощете, отъ старѣишихъ и до меышихъ». Они же послушаша его, отступиша мало вь церкви, здумаша и послаша два брата, глаголюще сице: «Егоже изволитъ Богъ и твоа честнаа молитва, егоже тебѣ любо, того намъ рци». Феодосии же рече имь: «Да аще хощете отъ мене приати игумена, то азъ сътворю вамъ не по своему изволению, но по Божию устроению». И нарече имь Иакова прозвытера; братии же нелюбь бысть, глаголюще: «Не здѣ постригань есть», бѣ бо Иаковь пришель издалеча з братомъ съ Павломъ. И начаша братиа просити Стефана демественика, да будетъ имь игумень, суща тогда ученика Феодосиева, глаголюще: «Яко сеи възрасль есть подъ рукою твоею, и уже бѣ послужилъ есть; сего ны вьдаи». И рече имъ Феодосии: «Се азъ по Божию повелѣнию нарекль быхь Иакова; се же вы свою волю творити хощете». И послушавъ ихъ предасть имъ Стефана, да будетъ имь игумень, и благослови Стефана, рече ему: «Чадо, се предаю ти манастырь, блюди сь опасениемь его, и яже устроихъ въ службахъ, то дръжи, предания манастырскаа и устава не измѣняи, но твори вся по закону и по чину манастырскому». И посемь вьземше его братиа и несоша въ келию, положиша его на одрѣ. И шестому дню наставшу, болну сущу ему велми, прииде къ нему князь великыи Святославь съ сыномь своимъ Глѣбомъ. Сидящимъ имъ у него, рече ему Феодосии: «Се отхожду свѣта сего, се предаю ти манастырь на съблюдение, еда буде что смятение въ немъ; и се поручаю игуменьство Стефану, и не даи его въ обиду». Князь великии Святославь цѣловавь его, обѣщася манастыремъ пещися, и отъиде отъ него. Феодосию же приспѣ конець житию, и преставися мѣсяца маиа 3 день, на память святыхь мученикь Тимофеа и Маври.

В лѣто 6583 [1075]. Приидоша слы из Немець к Святославу, Святославь же, величаяся, показа им богатство свое; они же видѣвше безчисленое множество злата и сребра и паволок, рѣшя: Се ни въ что же есть, се бо лежит мертво; сего суть смѣтье лучши, мужи бо ся доищут и болша сих. Сице бо похвалися Иезикиа, царь Иудеискъ, къ слом царя Асурииска; егоже вся взяша бышя в Вавулон; тако и по сего смерти все имѣние разсыпася разно.

В лѣто 6583 [1075]. Приидоша посли из Немець къ великому князю Святославу. Святославъ же, величаяся, показа имъ богатество свое. Они же, видѣвше бесчисленое множество злата и сребра, и паволокы, и рѣша: «Се ни во что же есть, се бо лежить мертво и сметье. Мужи бо ся доищуть болши и сихъ». Сии бо похвалися и Езекѣия царь июдеискы къ посломъ царя асурѣиска, его же взята быша въ Вавилонъ. Тако и по сего смерти имѣние рассыпася разно.

Въ лѣто 6583 [1075]. Приидоша посли изъ Нѣмець къ великому князю Святославу, Святославъ же величаяся, показа имъ богатство свое; они же видѣвше множество бесчисленое злата, и сребра и паволокы, и рѣша: «Се не въ что же есть, се бо лежить мертво, сего суть кметие лучьше, мужи бо ся доищутъ болша сихъ». Тако бо похвалися Иезекиа, царь Ииудеискыи, кь посломъ царя Асириискаго, егоже вся взята быша въ Вавилонь; тако и по сего смерти имѣние разсыпася разно.

В лѣто 6584 [1076]. Преставися Святослав, сынь Ярославль, от рѣзаниа желвеи, и положен бысть в Черниговѣ у святого Спаса. И сѣд по нем на столѣ Всеволод.

В лѣто 6584 [1076]. Преставися князя великаго сынъ Ярославль Святославъ, и положенъ бысть в Черниговѣ въ Святѣмъ Спасѣ. Сѣде по немъ княземъ великымъ на столѣ Всеволодъ.

Въ лѣто 6584 [1076]. Преставися князь великыи Святославъ Ярославичь, декабря 27, отъ рѣзаниа жолвии, и положень бысть въ Чрьниговѣ въ святѣмь Спасѣ, княживь 4 лѣта; и сѣде по немъ на великомь княжении брать его Всеволодь Ярославичь.

В лѣто 6587 [1079]. Прииде Роман с половци к Воиню, Всеволод же став у Переяславля и створи миръ с половци; и възвратися Роман с половци вспять, и убиша и половци, августа 2; и суть кости его и доселѣ, сына Святославля, внука Ярославля. А Олга, емше, поточиша за море, к Царюграду; и Всеволод же посади посадника в Тмуторокани Ратибора.

В лѣто 6587 [1079]. Прииде Романъ с половци к Воинъ. Всеволодъ же ста у Переяславля и створи миръ с половци. И възвратися Романъ с половци въспять. И бывшу ему, убиша его половци ту августа 2, и суть кости его и доселе, сына Святославля, а внука Ярославля. А Олга, емше, поточиша за море Царюграду. И Всеволодъ же посади намѣстника своего Ратибора Тмуторокани.

Того же лѣта прииде Олегь Святославичь ис Томуторокани съ половци Чернигову, на князя Володимера Всеволодича Манамаха Онъ же сътвори съ нимь миръ, и иде вь Переяславль, вь свою отчизну, а Олегь сѣде въ Черниговѣ, на столѣ отца своего Святослава Ярославича. Егда бо раздѣлишася трие Ярославичи всею Рускою землею, взя болшии, Изяславъ, Киевь и Новогородъ и иные грады Киевскаго предѣла, рекше западную страну , а Святославу Ярославичу достася Черниговъ и вся страна восточнаа и до Мурома, а Всеволоду Переяславль и вся полунощная, Ростовъ и Бѣлоозеро, и все Поволжие; того ради и прииде Олегь Святославичь на Володимера, занеже то бяше столъ отца его.